ಭರವಸೆ ಈಡೇರಿಸುವಂತೆ ಸಿಪಿಐ ಮುಖಂಡರಿಂದ ಜನಾಗ್ರಹ ಚಳುವಳಿ

ಉದಯವಾಹಿನಿ ಮಸ್ಕಿ: ರಾಜ್ಯ ಸರ್ಕಾರ ನೀಡಿರುವ ಭರವಸೆಗಳನ್ನು ಈಡೇರಿಸುವಂತೆ ಒತ್ತಾಯಿಸಿ ಇಲ್ಲಿನ ಸಿಪಿಐ ಮುಖಂಡರು ಜನಾಗ್ರಹ ಚಳುವಳಿ ಮೂಲಕ ಒತ್ತಾಯಿಸಿದರು.

ಪಟ್ಟಣದ ಡಾ.ಬಿ.ಆರ್ ಅಂಬೇಡ್ಕರ್ ಪ್ರತಿಮೆ ಬಳಿ ತಹಶೀಲ್ದಾರ ಅರಮನೆ ಸುಧಾ‌ ಅವರ ಮೂಲಕ ರಾಜ್ಯ ಸರ್ಕಾರಕ್ಕೆ ಮನವಿ ಸಲ್ಲಿಸಿದರು. ಅಧಿಕಾರಕ್ಕೆ ಬರುವ ಮುನ್ನ ಕಾಂಗ್ರೆಸ್ ನೀಡಿರುವ 6ನೇ ಭರವಸೆ ಅಂಗನವಾಡಿ ಕಾರ್ಯಕರ್ತೆಯರಿಗೆ ಗೌರವಧನ ಹೆಚ್ಚಿಸಬೇಕು, ಬಿಜೆಪಿ ಜಾರಿಗೆ ತಂದಿರುವ ಎಪಿಎಂಸಿ ಕಾಯಿದೆಯನ್ನು ರದ್ದುಗೊಳಿಸಬೇಕು, ರಾಜ್ಯದ ಪೌರ ಕಾರ್ಮಿಕರ ಸೇವೆಯನ್ನು ಖಾಯಂಗೊಳಿಸಿ,ಸರಕಾರಿ ಸೌಲಭ್ಯಗಳನ್ನು ವಿಸ್ತರಿಸಬೇಕು, ಮಹಿಳಾ ದೌರ್ಜನ್ಯ ತಡೆಯಲು  ಕಠಿಣ ಕಾನೂನು ಕ್ರಮ ಜರುಗಿಸಬೇಕು,ರಾಜ್ಯದಲ್ಲಿ ಉಂಟಾಗಿರುವ ಬರ ಸ್ಥಿತಿಯನ್ನು ನಿರ್ವಹಿಸಲು ಅಗತ್ಯ ಕ್ರಮ ಕೈಗೊಳ್ಳಬೇಕು,ಮಸ್ಕಿ ಪಟ್ಟಣದ ಸರ್ಕಾರಿ ಆಸ್ಪತ್ರೆಯನ್ನು ಮೇಲ್ದರ್ಜೆಗೇರಿಸಬೇಕು,ಮಸ್ಕಿ ನಾಲಾ ಯೋಜನೆ ವಿಸ್ತರಿಸಿ ಇನ್ನಷ್ಟು ರೈತರ ಜಮೀನಿಗೆ ನೀರಿನ ಸೌರ್ಕಯ ಕಲ್ಪಿಸಬೇಕು, ಕನಕನಾಲಾ ಯೋಜನೆಯನ್ನು ಪುನಶ್ಚೇತನಗೊಳಿಸಬೇಕು, ಮನೆ ಇಲ್ಲದ ಕಡುಬಡವರಿಗೆ ನಿವೇಶನ ಮಂಜೂರು ಮಾಡಬೇಕೆಂದು ಮನವಿ ಮಾಡಿದರು. ಈ ಸಂದರ್ಭದಲ್ಲಿ ಸಿಪಿಐ ಮುಖಂಡ ದೇವರಾಜ ಮಡಿವಾಳ, ಶಿವಮ್ಮ, ಚಂದ್ರಶೇಖರ ಕ್ಯಾತನಟ್ಟಿ,ರಾಮಣ್ಣ, ಮಲ್ಲಪ್ಪ, ಚಂದ್ರಕಲಾ ಸೇರಿದಂತೆ ಇನ್ನಿತರಿದ್ದರು.