ಉದಯವಾಹಿನಿ, ನಿರೀಕ್ಷೆಯಂತೆ ಬಿಸಿಸಿಐ ನೂತನ ಅಧ್ಯಕ್ಷರಾಗಿ ಮಿಥುನ್ ಮನ್ಹಾಸ್ ನೇಮಕಗೊಂಡಿದ್ದಾರೆ. ಭಾನುವಾರ ಮುಂಬೈನಲ್ಲಿ ನಡೆದ ವಾರ್ಷಿಕ ಸಾಮಾನ್ಯ ಸಭೆ (ಎಜಿಎಂ)ಯಲ್ಲಿ ಅವರನ್ನು ಅವಿರೋಧವಾಗಿ ಆಯ್ಕೆ ಮಾಡಲಾಯಿತು. ಸೌರವ್ ಗಂಗೂಲಿ ಮತ್ತು ರೋಜರ್ ಬಿನ್ನಿ ನಂತರ ಈ ಹುದ್ದೆಯನ್ನು ಅಲಂಕರಿಸಿದ ಸತತ ಮೂರನೇ ಕ್ರಿಕೆಟಿಗ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಕೆಎಸ್ಸಿಎ ಅಧ್ಯಕ್ಷ ರಘುರಾಮ್ ಭಟ್ ಅವರು ಖಜಾಂಜಿಯಾಗಿ ಹುದ್ದೆಗೆ ಅವಿರೋಧವಾಗಿ ಆಯ್ಕೆಯಾದರು. ಉಳಿದಂತೆ ರಾಜೀವ್ ಶುಕ್ಲಾ ಉಪಾಧ್ಯಕ್ಷರಾಗಿ, ಕಾರ್ಯದರ್ಶಿಯಾಗಿ ದೇವಜಿತ್ ಸೈಕಿಯಾ ಮರು ಆಯ್ಕೆಯಾದರು.
ಮಾನ್ಹಾಸ್ ಬಿಸಿಸಿಐನ 37ನೇ ಅಧ್ಯಕ್ಷ ಎನಿಸಿಕೊಂಡರು. ಜತೆಗೆ ಬಿಸಿಸಿಐ ಚುಕ್ಕಾಣಿ ಹಿಡಿದ ಜಮ್ಮು-ಕಾಶ್ಮೀರದ ಮೊದಲ ವ್ಯಕ್ತಿ ಎನಿಸಿಕೊಂಡರು. ಕಳೆದ ಭಾನುವಾರ ನಾಮಪತ್ರ ಸಲ್ಲಿಸುವಾಗಲೇ ಮಾನ್ಹಾಸ್ ಅವಿರೋಧ ಆಯ್ಕೆಯಾಗುವುದು ಖಚಿತಗೊಂಡಿತ್ತು. ಅಕ್ಟೋಬರ್ 12, 1979 ರಂದು ಜಮ್ಮು ಮತ್ತು ಕಾಶ್ಮೀರದಲ್ಲಿ ಜನಿಸಿದ ಮನ್ಹಾಸ್, ರಾಷ್ಟ್ರೀಯ ತಂಡಕ್ಕಾಗಿ ಒಂದೇ ಒಂದು ಪಂದ್ಯವನ್ನು ಆಡದಿದ್ದರೂ, ಭಾರತೀಯ ದೇಶೀಯ ಕ್ರಿಕೆಟ್ನಲ್ಲಿ ದಿಗ್ಗಜ ಎಂದು ಹೆಸರುವಾಸಿಯಾಗಿದ್ದರು. ಅವರು ಬಲಗೈ ಬ್ಯಾಟಿಂಗ್, ಆಫ್-ಸ್ಪಿನ್ ಬೌಲಿಂಗ್ ಮತ್ತು ಅಗತ್ಯವಿದ್ದಾಗ ವಿಕೆಟ್ ಕೀಪಿಂಗ್ ಮಾಡುವ ಉಪಯುಕ್ತ ಆಟಗಾರ ಎಂದು ಹೆಸರುವಾಸಿಯಾಗಿದ್ದರು.
18 ವರ್ಷಗಳ ಪ್ರಥಮ ದರ್ಜೆ ವೃತ್ತಿಜೀವನದಲ್ಲಿ, ಮನ್ಹಾಸ್ ಒಟ್ಟು 157 ಪಂದ್ಯಗಳನ್ನು ಆಡಿದ್ದಾರೆ. ಮತ್ತು 46 ಕ್ಕಿಂತ ಕಡಿಮೆ ಸರಾಸರಿಯಲ್ಲಿ 9,714 ರನ್ ಗಳಿಸಿದ್ದಾರೆ. ಈ ಸಮಯದಲ್ಲಿ, ಅವರು 27 ಶತಕಗಳು ಮತ್ತು 49 ಅರ್ಧಶತಕಗಳನ್ನು ಗಳಿಸಿದ್ದಾರೆ. 2007-08ರಲ್ಲಿ ದೆಹಲಿ ತಂಡವನ್ನು ರಣಜಿ ಟ್ರೋಫಿ ಪ್ರಶಸ್ತಿಗೆ ಮುನ್ನಡೆಸಿದಾಗ ಮತ್ತು ಅವರ ತಂಡಕ್ಕೆ ದೀರ್ಘ ಚಾಂಪಿಯನ್ಶಿಪ್ ಬರಗಾಲವನ್ನು ಕೊನೆಗೊಳಿಸಿದಾಗ ಮನ್ಹಾಸ್ ಅವರ ಅತ್ಯುತ್ತಮ ಋತುವಾಗಿತ್ತು. ಆ ಋತುವಿನಲ್ಲಿ, ಮಾಜಿ ಕ್ರಿಕೆಟಿಗ 57.56 ಸರಾಸರಿಯಲ್ಲಿ 921 ರನ್ ಗಳಿಸಿದ್ದರು.
