ಉದಯವಾಹಿನಿ, ದೆಹಲಿ: ಭಾರತೀಯ ರೈಲ್ವೆ ಕೇಟರಿಂಗ್ ಮತ್ತು ಟೂರಿಸಂ ಕಾರ್ಪೊರೇಷನ್ ಲಿಮಿಟೆಡ್ (ಐಆರ್ಸಿಟಿಸಿ) ತನ್ನ ಮೊದಲ ‘ಭಾರತ್ ಗೌರವ ಡಿಲಕ್ಸ್ ಎಸಿ ಟೂರಿಸ್ಟ್ ರೈಲು ಅನ್ನು ‘ಪಶುಪತಿನಾಥ ನೇಪಾಳ (Nepal) ದರ್ಶನ ಯಾತ್ರೆ’ಯ ಮೂಲಕ ಪ್ರಾರಂಭಿಸಲಿದೆ. ಈ ವಿಶೇಷ ರೈಲಿನಲ್ಲಿ ರೆಸ್ಟೋರೆಂಟ್ ಸೌಲಭ್ಯವಿದ್ದು, ಇದರಲ್ಲಿ ಇಂದೋರ್ನಿಂದ ಅಕ್ಟೋಬರ್ 4ರಂದು ಪ್ರಯಾಣ ಆರಂಭಿಸಲಿದೆ. ಇಂದೋರ್, ಉಜ್ಜಯಿನಿ, ಶುಜಾಲ್ಪುರ್, ಸೆಹೋರ್, ರಾಣಿ ಕಮಲಾಪತಿ, ಇಟಾರ್ಸಿ, ನರಸಿಂಗ್ಪುರ್, ಜಬಲ್ಪುರ್, ಕಟ್ನಿ ಮತ್ತು ಸತ್ನಾ ಸೇರಿದಂತೆ ಪ್ರಮುಖ ತಾಣಗಳಿಗೆ ಭೇಟಿ ನೀಡಲಿದೆ.
ಈ 9 ರಾತ್ರಿ ಹಾಗೂ 10 ದಿನಗಳ ಪ್ರವಾಸವು ಚಿತ್ವಾನ್ ರಾಷ್ಟ್ರೀಯ ಉದ್ಯಾನ, ಪೊಖಾರಾ, ಕಾಠ್ಮಂಡು ಮತ್ತು ನೇಪಾಳದ ಪವಿತ್ರ ಪಶುಪತಿನಾಥ ದೇವಾಲಯ ಸೇರಿದಂತೆ ಸುಂದರ ಮತ್ತು ಆಧ್ಯಾತ್ಮಿಕ ತಾಣಗಳನ್ನು ಒಳಗೊಂಡಿದೆ. ಪ್ರತಿ ವ್ಯಕ್ತಿಯ ಪ್ರವಾಸ ಶುಲ್ಕವು ಪ್ರಯಾಣ ವರ್ಗದ ಆಧಾರದ ಮೇಲೆ ವಿಂಗಡಿಸಲಾಗಿದೆ. ಕಂಫರ್ಟ್ ಕ್ಯಾಟಗರಿಯಲ್ಲಿ 3ಎಸಿ ಶುಲ್ಕ 63,850 ರೂ. ಆಗಿದೆ. ಡಿಲಕ್ಸ್ ಕ್ಯಾಟಗರಿಯ 2ಎಸಿ ವಸತಿಗೆ 75,230 ರೂ. ನಿಗದಿಯಾಗಿದೆ. ಸೂಪಿರಿಯರ್ ಕ್ಯಾಟಗರಿ – ಕ್ಯಾಬಿನ್ 1ಎಸಿಗೆ 91,160 ರೂ. ಮತ್ತು ಅತ್ಯಂತ ದುಬಾರಿ ಆಯ್ಕೆಯಾದ ಸೂಪಿರಿಯರ್ ಕ್ಯಾಟಗರಿ – ಕೂಪೆ 1ಎಸಿಗೆ 99,125 ರೂ. ಆಗಿದೆ.
