ಉದಯವಾಹಿನಿ, ನವದೆಹಲಿ: ಪ್ರಸಕ್ತ ಹಣಕಾಸು ವರ್ಷದಲ್ಲಿ 8,200 ಕೋಟಿ ರೂ. ಆದಾಯವನ್ನು ಹೊಂದುವ ಮಹತ್ವದ ಒಪ್ಪಂದಕ್ಕೆ MNRE ಮತ್ತು IREDA ಸಹಿ ಹಾಕಿವೆ ಎಂದು ಕೇಂದ್ರ ನವೀಕರಿಸಬಹುದಾದ ಇಂಧನ ಸಚಿವ ಪ್ರಹ್ಲಾದ್ ಜೋಶಿ (Prahlad Joshi) ತಿಳಿಸಿದ್ದಾರೆ.ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಇಲಾಖೆ (MNRE) ಮತ್ತು ಭಾರತೀಯ ನವೀಕರಿಸಬಹುದಾದ ಇಂಧನ ಅಭಿವೃದ್ಧಿ ಸಂಸ್ಥೆ (IREDA) ಜಂಟಿಯಾಗಿ 2025-26ರ ಆರ್ಥಿಕ ವರ್ಷದ ಕಾರ್ಯತಂತ್ರದ ಗುರಿ ಹಾಕಿಕೊಂಡಿದ್ದು, ಕಾರ್ಯಕ್ಷಮತೆ ಒಪ್ಪಂದಕ್ಕೆ (MoU) ಸಹಿ ಹಾಕಿವೆ.
ನವದೆಹಲಿಯ ಅಟಲ್ ಅಕ್ಷಯ್ ಉರ್ಜಾ ಭವನದಲ್ಲಿ ನಡೆದ ಕಾರ್ಯಕ್ರಮದಲ್ಲಿ MNRE ಪರವಾಗಿ ಕಾರ್ಯದರ್ಶಿ ಸಂತೋಷ್ ಕುಮಾರ್ ಸಾರಂಗಿ ಹಾಗೂ IREDA ಅಧ್ಯಕ್ಷರು ಮತ್ತು ವ್ಯವಸ್ಥಾಪಕ ನಿರ್ದೇಶಕ ಪ್ರದೀಪ್ ಕುಮಾರ್ ದಾಸ್ ಅವರು ಉಭಯ ಸಂಸ್ಥೆಗಳ ಹಿರಿಯ ಅಧಿಕಾರಿಗಳ ಸಮ್ಮುಖದಲ್ಲಿ ಒಪ್ಪಂದಕ್ಕೆ ಸಹಿ ಹಾಕಿದರು ಎಂದು ಮಾಹಿತಿ ನೀಡಿದ್ದಾರೆ. MNRE ಮತ್ತು IREDA ಒಪ್ಪಂದವು ನಿವ್ವಳ ಮೌಲ್ಯದ ಮೇಲಿನ ಆದಾಯ, ಉದ್ಯೋಗದ ಬಂಡವಾಳದ ಮೇಲಿನ ಆದಾಯ, ಒಟ್ಟು ಸಾಲಗಳಿಗೆ NPA, ಆಸ್ತಿ ವಹಿವಾಟು ಅನುಪಾತ ಮತ್ತು EBT ನಂತಹ ಪ್ರಮುಖ ಕಾರ್ಯಕ್ಷಮತೆಯನ್ನು ಸಹ ಒಳಗೊಂಡಿದೆ ಎಂದು ತಿಳಿಸಿದ್ದಾರೆ.
ಕೇಂದ್ರ ಸರ್ಕಾರ 2025-26ನೇ ಹಣಕಾಸು ವರ್ಷದಲ್ಲಿ ನವೀಕರಿಸಬಹುದಾದ ಇಂಧನ ಕಾರ್ಯಾಚರಣೆಗಳಿಂದ 8,200 ಕೋಟಿ ರೂ. ಆದಾಯ ಗಳಿಸಬೇಕು ಎಂಬ ಗುರಿಯನ್ನು ಹೊಂದಿದೆ. 2024-25ರಲ್ಲಿ IREDA ಕಾರ್ಯಾಚರಣೆಗಳಿಂದ 5,957 ಕೋಟಿ ರೂ. ಗುರಿಯ ಬದಲಾಗಿ 6,743.32 ಕೋಟಿ ರೂ. ಗಳಿಸಿದೆ. IREDA ಅತ್ಯುತ್ತಮ ಕಾರ್ಯಕ್ಷಮತೆ ಮುಂದುವರಿಸಿದ್ದು, 2020-21ನೇ ಹಣಕಾಸು ವರ್ಷದಿಂದ ಸತತ 4 ವರ್ಷಗಳ ಕಾಲ ಎಂಒಯು ಕಾರ್ಯಕ್ಷಮತೆಯಲ್ಲಿ ‘ಅತ್ಯುತ್ತಮ’ ರೇಟಿಂಗ್ ಗಳಿಸಿದೆ. 2023-24ನೇ ಹಣಕಾಸು ವರ್ಷಕ್ಕೆ ಎಂಒಯು ರೇಟಿಂಗ್ನಲ್ಲಿ 84 ಸಿಪಿಎಸ್ಇಗಳ ಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿದೆ.
