ಉದಯವಾಹಿನಿ, ಆಮ್ಸ್ಟರ್ಡ್ಯಾಮ್: ನೆದರ್ಲ್ಯಾಂಡ್ಸ್ನ ವಿಜ್ಞಾನಿಗಳು ಮಾನವನ ಗಂಟಲಿನಲ್ಲಿ ಹೊಸ ಅಂಗವನ್ನು ಕಂಡುಹಿಡಿದಿದ್ದಾರೆ. ಇದು ಮಾನವ ಶರೀರಶಾಸ್ತ್ರದ ತಿಳುವಳಿಕೆಯನ್ನು ಬದಲಾಯಿಸಬಹುದು ಎನ್ನುವ ನಿರೀಕ್ಷೆ ಇದೆ. 2020ರಲ್ಲಿ ಕ್ಯಾನ್ಸರ್ ಸ್ಕ್ಯಾನ್ನ ಸಂದರ್ಭದಲ್ಲಿ ಆಕಸ್ಮಿಕವಾಗಿ ಗಂಟಲಿನ ಒಳಭಾಗದಲ್ಲಿ ‘ಟ್ಯೂಬರಿಯಲ್ ಲಾಲಾರಸ ಗ್ರಂಥಿಗಳು ಎಂಬ ಹೊಸ ಗ್ರಂಥಿಗಳನ್ನು ಕಂಡುಹಿಡಿಯಲಾಗಿದೆ. ಈ ಆವಿಷ್ಕಾರವು ತಲೆ ಮತ್ತು ಕುತ್ತಿಗೆಯ ಕ್ಯಾನ್ಸರ್ ರೋಗಿಗಳ ಆಯಸ್ಸನ್ನು ಹೆಚ್ಚಿಸಬಹುದು ಎನ್ನಲಾಗಿದೆ.
ದರ್ಲ್ಯಾಂಡ್ಸ್ ಕ್ಯಾನ್ಸರ್ ಇನ್ಸ್ಟಿಟ್ಯೂಟ್ನಲ್ಲಿ ವಿಜ್ಞಾನಿಗಳು PSMA PET-CT ಸ್ಕ್ಯಾನ್ನ ಮೂಲಕ ಪ್ರಾಸ್ಟೇಟ್ ಕ್ಯಾನ್ಸರ್ ಗುರುತಿಸುವ ಪರೀಕ್ಷೆ ನಡೆಸುತ್ತಿದ್ದಾಗ ಈ ಆವಿಷ್ಕಾರ ನಡೆಯಿತು. ಈ ಸ್ಕ್ಯಾನ್ನಲ್ಲಿ ರೇಡಿಯೊಆಕ್ಟಿವ್ ಟ್ರೇಸರ್ನ್ನು ದೇಹಕ್ಕೆ ಚುಚ್ಚಲಾಗುತ್ತದೆ, ಇದು ಕ್ಯಾನ್ಸರ್ ಗೆಡ್ಡೆಗಳನ್ನು ಗುರುತಿಸುತ್ತದೆ. ಆದರೆ ಈ ಪರೀಕ್ಷೆಯಲ್ಲಿ ನಾಸೊಫಾರಿಂಕ್ಸ್ (ಮೂಗಿನ ಹಿಂಭಾಗ) ಪ್ರದೇಶದಲ್ಲಿ ಎರಡು ಅನಿರೀಕ್ಷಿತ ಗ್ರಂಥಿಗಳು ಕಂಡು ಬಂದವು. ಸುಮಾರು 1.5 ಇಂಚು ಉದ್ದದ ಈ ಗ್ರಂಥಿಗಳು, ಲಾಲಾರಸ ಗ್ರಂಥಿಗಳಂತೆ ಕಾಣುತ್ತವೆ. “ನಾಸೊಫಾರಿಂಕ್ಸ್ನಲ್ಲಿ ಕೇವಲ ಸೂಕ್ಷ್ಮ ಗ್ರಂಥಿಗಳಿವೆ ಎಂದು ತಿಳಿದಿದ್ದೆವು. ಈ ಆವಿಷ್ಕಾರ ನಮಗೆ ಆಶ್ಚರ್ಯ ತಂದಿತು” ಎಂದು ರೇಡಿಯೇಶನ್ ಆಂಕಾಲಜಿಸ್ಟ್ ವೌಟರ್ ವೋಗಲ್ ತಿಳಿಸಿದ್ದಾರೆ.
‘ಟ್ಯೂಬರಿಯಲ್ ಲಾಲಾರಸ ಗ್ರಂಥಿಗಳು’ ಮೂಗಿನ ಹಿಂಭಾಗದ ಪ್ರದೇಶವನ್ನು ತೇವವಾಗಿಡಲು ಸಹಾಯ ಮಾಡುತ್ತವೆ ಎಂದು ಸಂಶೋಧಕರು ಊಹಿಸಿದ್ದಾರೆ. ಈ ಗ್ರಂಥಿಗಳು 100 ರೋಗಿಗಳ ಸ್ಕ್ಯಾನ್ಗಳಲ್ಲಿ ಕಂಡುಬಂದಿದ್ದು, ಆವಿಷ್ಕಾರದ ವಿಶ್ವಾಸಾರ್ಹತೆಯನ್ನು ದೃಢೀಕರಿಸುತ್ತದೆ. ಈ ಗ್ರಂಥಿಗಳ ಕಾರ್ಯವು ತಲೆ ಮತ್ತು ಕುತ್ತಿಗೆಯ ಕ್ಯಾನ್ಸರ್ ರೋಗಿಗಳಿಗೆ ವಿಕಿರಣ ಚಿಕಿತ್ಸೆಯ ಸಂದರ್ಭದಲ್ಲಿ ಉಪಯುಕ್ತವಾಗಬಹುದು.
