ಉದಯವಾಹಿನಿ, ಹಲ್ದ್ವಾನಿ: ಉತ್ತರಾಖಂಡ್ನ ಹಲ್ದ್ವಾನಿಯ ಜನಪ್ರಿಯ ಯೂಟ್ಯೂಬರ್ ಮತ್ತು ಕಂಟೆಂಟ್ ಕ್ರಿಯೇಟರ್ ಸೌರವ್ ಜೋಶಿ ಅವರಿಗೆ ‘ಭಾವು ಗ್ಯಾಂಗ್’ ಹೆಸರಿನಲ್ಲಿ 5 ಕೋಟಿ ರೂ. ಬೆದರಿಕೆ ಇಮೇಲ್ ಬಂದಿದೆ. ಸೆಪ್ಟೆಂಬರ್ 15ರಂದು ಇಮೇಲ್ ಮೂಲಕ ‘ಛೋಟಾ ಡಾನ್’ ನೇತೃತ್ವದ ಗ್ಯಾಂಗ್ ಸದಸ್ಯನೆಂದು ಹೇಳಿಕೊಂಡ ವ್ಯಕ್ತಿ, ಹಣ ನೀಡದಿದ್ದರೆ ಗುಂಡಿಕ್ಕುವ ಎಚ್ಚರಿಕೆ ನೀಡಿದ್ದಾನೆ. ಜೋಶಿ ಅವರು ತಕ್ಷಣ ಕೋಟ್ವಾಲಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
ಇಮೇಲ್ನಲ್ಲಿ, “ನೀನು 5 ಕೋಟಿ ರೂ. ನೀಡದಿದ್ದರೆ ಗುಂಡಿಕ್ಕುತ್ತೇನೆ” ಎಂದು ಧಮ್ಕಿ ಹಾಕಲಾಗಿದ್ದು, ಜೋಶಿ ಅವರ ಹಲ್ದ್ವಾನಿ ರಾಂಪುರ್ ರಸ್ತೆಯ ಒಲಿವಿಯಾ ಕಾಲೊನಿಯಲ್ಲಿರುವ ಮನೆಯ ವಿಳಾಸವನ್ನು ಉಲ್ಲೇಖಿಸಲಾಗಿದೆ. ಸೌರವ್ ಜೋಶಿ, ತನ್ನ ‘ಸೌರವ್ ಜೋಶಿ ವ್ಲಾಗ್ಸ್’ ಚಾನಲ್ ಮೂಲಕ 29 ಮಿಲಿಯನ್ ಸಬ್ಸ್ಕ್ರೈಬರ್ಗಳನ್ನು ಹೊಂದಿರುವ ಜನಪ್ರಿಯ ಕಂಟೆಂಟ್ ಕ್ರಿಯೇಟರ್ ಆಗಿದ್ದಾರೆ. ಈ ಧಮ್ಕಿಯಿಂದ ಆತನ ಕುಟುಂಬದವರು ಆತಂಕಗೊಂಡಿದ್ದು, ಪೊಲೀಸರು ಭದ್ರತೆಯನ್ನು ಹೆಚ್ಚಿಸಿದ್ದಾರೆ. ಸಿಟಿ ಎಸ್ಪಿ ಪ್ರಕಾಶ್ ಚಂದ್ರ, “ಈ ದೂರನ್ನು ಗಂಭೀರವಾಗಿ ತೆಗೆದುಕೊಂಡಿದ್ದೇವೆ. ಸೈಬರ್ ತಜ್ಞರು ಇಮೇಲ್ ಮೂಲವನ್ನು ವಿಶ್ಲೇಷಿಸುತ್ತಿದ್ದಾರೆ ಮತ್ತು ಡಿಜಿಟಲ್ ಟ್ರ್ಯಾಕ್ಗಳನ್ನು ಅನ್ವೇಷಿಸುತ್ತಿದ್ದಾರೆ. ಕೇಂದ್ರೀಯ ಏಜೆನ್ಸಿಗಳೊಂದಿಗೆ ಸಮನ್ವಯದಲ್ಲಿದ್ದೇವೆ, ಏಕೆಂದರೆ ವಿದೇಶಿ ಸಂಬಂಧವಿರಬಹುದು” ಎಂದಿದ್ದಾರೆ. ಇಮೇಲ್ನ ಮೂಲವನ್ನು ಗುರುತಿಸಲು ಸೈಬರ್ ಕ್ರೈಮ್ ತಂಡಗಳು ಚುರುಕುಗೊಂಡಿವೆ.
