ಉದಯವಾಹಿನಿ, ನವದೆಹಲಿ: ನುಗ್ಗೆ ಸೊಪ್ಪಿಗಿಂತಲೂ ನುಗ್ಗೆ ಕಾಯಿಯ ಬಳಕೆ ಜನಪ್ರಿಯ ಮತ್ತು ವ್ಯಾಪಕವಾಗಿದೆ. ಆದರೆ ಸ್ವಲ್ಪ ಒಗರು ರುಚಿಯ ನುಗ್ಗೆಯ ಸೊಪ್ಪೂ ಆರೋಗ್ಯಕ್ಕೆ ಅಷ್ಟೇ ಲಾಭದಾಯಕ. ಇತ್ತೀಚಿನ ವರ್ಷಗಳಲ್ಲಿ ʻಮಿರಾಕಲ್ ಟೀʼ ಎಂದೇ ಕರೆಸಿ ಕೊಳ್ಳುತ್ತಿರುವ ನುಗ್ಗೆಸೊಪ್ಪಿನ ಚಹಾ ಈಗಾಗಲೇ ಹಲವರ ದಿನಚರಿಯ ಭಾಗವಾಗಿದೆ. ನಿತ್ಯದ ಕಾಫಿ, ಚಹಾದ ಬದಲಿಗೆ ಬೇರೇನಾದರೂ ಆರೋಗ್ಯಕರ ಆಯ್ಕೆಗಳು ಬೇಕು ಎಂದು ಹುಡುಕುತ್ತಿರುವವರು ನೀವಾದರಂತೂ ನುಗ್ಗೆಸೊಪ್ಪಿನ ಚಹಾ ಸೃಷ್ಟಿಯಾಗಿದ್ದೇ ನಿಮಗೆ ಎಂದುಕೊಳ್ಳಿ! ಕಾರಣ, ನುಗ್ಗೆಯ ಔಷ ಧೀಯ ಗುಣಗಳು ಒಂದೆರಡೇ ಅಲ್ಲ. ಏನೀ ಚಹಾ ಕುಡಿಯುವುದು ಲಾಭಗಳು ಎಂಬುದನ್ನು ತಿಳಿಯೋಣ.
ಪೋಷಕಾಂಶಗಳು ಏನಿವೆ?: ಖನಿಜಗಳು ಮತ್ತು ಜೀವಸತ್ವಗಳು ನುಗ್ಗೆ ಸೊಪ್ಪಿನಲ್ಲಿ ಬೇಕಾದಷ್ಟಿವೆ. ವಿಟಮಿನ್ ಸಿ ಮತ್ತು ಎ, ಪೊಟಾಶಿಯಂ, ಕ್ಯಾಲ್ಶಿಯಂ, ಫ್ಲೆವನಾಯ್ಡ್ಗಳು ಇದರ ಮುಖ್ಯ ಸತ್ವಗಳು. ಇದಲ್ಲದೆ, ಇದರಲ್ಲಿ ಉತ್ಕೃಷ್ಟ ಗುಣಮಟ್ಟದ ಪ್ರೊಟೀನ್ ಸಹ ಇರುವುದರಿಂದ, ಆಹಾರ ಭಾಗವಾಗುವುದಕ್ಕೆ ಯೋಗ್ಯವಾಗಿದೆ. ಇದರಿಂದ ದೇಹದ ಒಟ್ಟಾರೆ ಆರೋಗ್ಯವನ್ನು ಖಂಡಿತಾ ವರ್ಧಿಸಿಕೊಳ್ಳಲು ಸಾಧ್ಯವಿದೆ.
ತೂಕ ಇಳಿಕೆ: ಕೊಬ್ಬು ಮತ್ತು ಪಿಷ್ಟಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ದೇಹ ಹೀರಿಕೊಳ್ಳದಂತೆ ತಡೆಯುವ ಸಾಮರ್ಥ್ಯವನ್ನು ನುಗ್ಗೆ ಸೊಪ್ಪು ಹೊಂದಿದೆ. ಈ ಸೊಪ್ಪಿನಲ್ಲಿರುವ ಕ್ಯಾಲರಿಗಳು ಕಡಿಮೆ. ಮಾತ್ರವಲ್ಲ, ಜೀರ್ಣಕ್ರಿಯೆಯನ್ನು ಚುರುಕುಗೊಳಿಸಿ, ದೇಹದ ಚಯಾಪಚಯವನ್ನು ವೃದ್ಧಿಸುವ ಕಾರಣದಿಂದ, ತೂಕ ಇಳಿಸಲು ಮತ್ತು ಕೊಬ್ಬು ಕರಗಿಸಲು ಇದನ್ನು ಬಳಕೆ ಮಾಡಲಾಗುತ್ತಿದೆ.
ರಕ್ತದೊತ್ತಡ ನಿಯಂತ್ರಣ: ಇತ್ತೀಚೆಗಿನ ಕೆಲವು ಅಧ್ಯಯನಗಳ ಪ್ರಕಾರ, ನಿಯಮಿತವಾಗಿ ನುಗ್ಗೆ ಸೊಪ್ಪಿನ ಚಹಾ, ಕಷಾಯ ಸೇವನೆಯಿಂದ ರಕ್ತದೊತ್ತಡ ನಿಯಂತ್ರಿಸುವಲ್ಲಿ ಪೂರಕ ಪರಿಣಾಮ ಕಂಡುಬಂದಿದೆ. ಸಿಸ್ಟೋಲಿಕ್ ಮತ್ತು ಡಯಾಸ್ಟೋಲಿಕ್- ಈ ಎರಡೂ ಅಂಕಿ-ಅಂಶಗಳಲ್ಲಿ ಗಣನೀಯ ನಿಯಂತ್ರಣ ಸಾಧಿಸಲು ಸಾಧ್ಯವಾಗಿದೆ. ಹಾಗಾಗಿ ಒಂದಿಷ್ಟು ನುಗ್ಗೆ ಸೊಪ್ಪಿನ ಚಹಾ ಹೀರಿ ನೋಡಿ.
ಉರಿಯೂತ ಶಮನ: ಫ್ಲೆವನಾಯ್ಡ್ಗಳು ಮತ್ತು ಫೆನೋಲಿಕ್ ಆಮ್ಲಗಳು ಸೇರಿದಂತೆ, ಪ್ರಬಲ ಉರಿಯೂತ ಶಾಮಕಗಳು ನುಗ್ಗೆ ಸೊಪ್ಪಿನಲ್ಲಿವೆ. ಹೃದ್ರೋಗ, ಕ್ಯಾನ್ಸರ್ನಂಥ ಗಂಭೀರ ರೋಗ ಗಳನ್ನು ದೂರವಿರಿಸಲು ಉರಿಯೂತ ಶಮನ ಮಾಡುವಂಥ ಸತ್ವಗಳು ಆಹಾರದಲ್ಲಿ ಅಗತ್ಯವಾಗಿ ಬೇಕು. ದೇಹದೆಲ್ಲೆಡೆ ಇರಬಹುದಾದ ಉರಿಯೂತ ತಗ್ಗಿಸುವ ಸಾಮರ್ಥ್ಯ ನುಗ್ಗೆ ಸೊಪ್ಪಿಗಿದೆ.
