ಉದಯವಾಹಿನಿ, ಶಿಮ್ಲಾ: ಸರ್ಕಾರಿ ಕಚೇರಿಯ ಮುಂದೆ ಮಹಿಳೆಯೊಬ್ಬರು ವೃದ್ಧ ವ್ಯಕ್ತಿಯ ಮೇಲೆ ಹಲ್ಲೆ ನಡೆಸಿರುವ ಘಟನೆ ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲೆಯಲ್ಲಿ ನಡೆದಿದೆ. ಆಕೆ ಆತನ ಮೇಲೆ ಎಣ್ಣೆ ಸುರಿದು ಕುತ್ತಿಗೆಗೆ ಶೂಗಳ ಹಾರ ಹಾಕಲು ಪ್ರಯತ್ನಿಸಿದ್ದಾಳೆ. ಈ ವೇಳೆ ಜನರು ದೃಶ್ಯವನ್ನು ವೀಕ್ಷಿಸುತ್ತಾ ನಿಂತಿದ್ದಾರೆ. ಅಂತಿಮವಾಗಿ ಪೊಲೀಸರು ಮಧ್ಯಪ್ರವೇಶಿಸಲು ಬಂದರು. ಇದರ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ.
ವರದಿಯ ಪ್ರಕಾರ, ರಕ್ಕರ್ ತಹಸಿಲ್ನಲ್ಲಿರುವ ಬಂಡಾ ಗ್ರಾಮದ ದೇಶಬಂದು ಎಂದು ಗುರುತಿಸಲ್ಪಟ್ಟ ಆ ವ್ಯಕ್ತಿ, ಪ್ರಕರಣವೊಂದಕ್ಕೆ ಸಂಬಂಧಿಸಿದ ನ್ಯಾಯಾಲಯದ ವಿಚಾರಣೆಗಾಗಿ ಡೆಹ್ರಾದಲ್ಲಿರುವ ಉಪವಿಭಾಗೀಯ ಕಚೇರಿಗೆ ಬಂದಿದ್ದರು. ಮಂಡಿ ಜಿಲ್ಲೆಯ ದೋಭಾ ಗ್ರಾಮದ ಆಶಾ ದೇವಿ ಎಂದು ಗುರುತಿಸಲ್ಪಟ್ಟ ಮಹಿಳೆ ಅನಿರೀಕ್ಷಿತವಾಗಿ ವೃದ್ಧನ ಮುಂದೆ ಬಂದು ವಾಗ್ವಾದ ಪ್ರಾರಂಭಿಸಿದ್ದಾಳೆ. ಈ ವೇಳೆ ಅದು ಹಿಂಸಾತ್ಮಕ ಘಟನೆಗೆ ಕಾರಣವಾಯಿತು.
ವರದಿಯ ಪ್ರಕಾರ, ಆಶಾ ದೇವಿ ಇದ್ದಕ್ಕಿದ್ದಂತೆ ದೇಶಬಂದು ಮೇಲೆ ಎಣ್ಣೆ ತುಂಬಿದ ಪಾತ್ರೆಯನ್ನು ಎರಚಿದ್ದಾರೆ. ಇದರಿಂದ ತಲೆ, ಬಟ್ಟೆ ತುಂಬೆಲ್ಲಾ ಎಣ್ಣೆಯುಕ್ತವಾಗಿದೆ. ನಂತರ ಆಶಾದೇವಿ ಅವರ ಮೇಲೆ ಶೂಗಳ ಹಾರವನ್ನು ಹಾಕಲು ಪ್ರಯತ್ನಿಸಿದರು. ಅಲ್ಲದೆ ಹಲವು ಬಾರಿ ಕಪಾಳಮೋಕ್ಷ ಮಾಡಿದರು ಎಂದು ವರದಿಯಾಗಿದೆ.
