ಉದಯವಾಹಿನಿ, ಇರಾನ್ ಜನರ ಪಾಲಿಗೆ ಇವು ʻಹಸನ್ಮುಖಿ ಬೀಜʼಗಳಾದರೆ, ಚೀನಾದವರಿಗೆ ಇವು ʻಹರ್ಷದ ಬೀಜʼಗಳು; ಫಿಟ್ನೆಟ್ ಪ್ರಿಯರಿಗೆ ʻಸ್ಕಿನ್ನಿ ನಟ್ʼ- ಇವೆಲ್ಲದಕ್ಕೂ ಒಂದೇ ಉತ್ತರ ಎನ್ನುತ್ತಾ, ಒಗಟು ಕೇಳುವ ಉದ್ದೇಶವಿಲ್ಲ. ಇವೆಲ್ಲವೂ ಪಿಸ್ತಾ ಬೀಜಗಳ ಬಗ್ಗೆಯೇ ಹೇಳಿದ್ದು. ನೋಡುವುದಕ್ಕೆ ಬಾಯೊಡೆದು ನಗುತ್ತಿರುವಂತೆ ಕಾಣುವ ಈ ಬೀಜಗಳಿಗೆ ನಗುಮೊಗದ ಬೀಜಗಳೆಂಬ ಅನ್ವರ್ಥನಾಮ ತಪ್ಪೇನಿಲ್ಲ ಬಾದಾಮಿ, ಗೋಡಂಬಿ, ಪಿಸ್ತಾ, ಚಿಯಾ, ಅಗಸೆ ಮುಂತಾದ ಎಲ್ಲ ಬೀಜಗಳೂ ಪ್ರೊಟೀನ್, ವಿಟಮಿನ್, ನಾರು, ಖನಿಜಗಳು ಮತ್ತು ಉತ್ತಮ ಕೊಬ್ಬುಗಳ ಗೋದಾಮಿದ್ದಂತೆ. ಹಾಗೆಂದು ಎಲ್ಲ ಬೀಜಗಳಲ್ಲೂ ಒಂದೇ ಪೋಷಕಾಂಶಗಳನ್ನು ಹೊತ್ತು ಬರುವುದಿಲ್ಲ. ಒಂದೊಂದೂ ಅನನ್ಯವಾದ ಸತ್ವಗಳನ್ನು ಅಡಕವಾಗಿಸಿಕೊಂಡಿವೆ. ಹಾಗಾದರೆ ಪಿಸ್ತಾದಲ್ಲಿರುವ ಗುಣಾಂಶಗಳು ಯಾವುವು?
ನಮ್ಮ ದೇಹಕ್ಕೆ ಅಗತ್ಯವಾದ ಎಲ್ಲಾ ಒಂಬತ್ತು ಅಮೈನೋ ಆಮ್ಲಗಳನ್ನು ಸರಿಯಾದ ಪ್ರಮಾಣದಲ್ಲಿ ಹೊಂದಿರುವ ಅತ್ಯುತ್ತಮವಾದ ಸಸ್ಯಜನ್ಯ ಪ್ರೊಟೀನ್ ಪಿಸ್ತಾದಿಂದ ದೊರೆಯುತ್ತದೆ. ಮೊಟ್ಟೆಯಲ್ಲಿರುವಂತೆಯೇ ಘನ ಸತ್ವಗಳನ್ನು ಪಿಸ್ತಾ ಸಹ ಹೊಂದಿದೆ. ಹಾಗಾಗಿ ಬಾಯಿ ಚಪಲವಾದಾಗ ಕಡಿಮೆ ಉಪ್ಪಿರುವ ಪಿಸ್ತಾಗಳನ್ನು ಬಾಯಾಡುವುದು ತಪ್ಪಲ್ಲ.
ಒಳ್ಳೆಯ ಪೋಷಕಾಂಶಗಳನ್ನು ಹೊಂದಿವೆ ಎಂದ ಮಾತ್ರಕ್ಕೆ ನಮ್ಮ ದೇಹಕ್ಕೆ ಇದು ಸಿಕ್ಕಾಪಟ್ಟೆ ಕ್ಯಾಲರಿಗಳನ್ನು ಸೇರಿಸುವುದಿಲ್ಲ. ಒಂದು ಸರ್ವಿಂಗ್ನಲ್ಲಿ, ಅಂದರೆ ಸುಮಾರು ೩೦ ಪಿಸ್ತಾಗಳನ್ನು ತಿಂದರೆ 100ಕ್ಕಿಂತ ಕಡಿಮೆ ಕ್ಯಾಲರಿ ನಮ್ಮ ದೇಹಕ್ಕೆ ದೊರೆಯುತ್ತದೆ. ಆದರೆ ಗುಣಮಟ್ಟದ ಪೋಷಕಸತ್ವಗಳು ದೇಹ ಸೇರುತ್ತವೆ. ಈ ಬೀಜಗಳಲ್ಲಿ ನಾರು ಮತ್ತು ಉತ್ತಮವಾದ ಕೊಬ್ಬಿನಂಶವೂ ಅಧಿಕ ಪ್ರಮಾಣದಲ್ಲಿದೆ. ಇಷ್ಟು ಸಣ್ಣ ಬೀಜಗಳನ್ನು ಬರೀ ೩೦ ತಿಂದರೆ… ರಾವಣನ ಹೊಟ್ಟೆಗೆ ಅರೆಕಾಸಿನ ಮಜ್ಜಿಗೆಯಾದೀತು ಎಂದೆಣಿಸಬೇಡಿ! ನಿಜಕ್ಕೂ ಹಸಿವನ್ನು ತಣಿಸುತ್ತದೆ ಪಿಸ್ತಾ. ಇದರಲ್ಲಿರುವ ಪ್ರೊಟೀನ್-ಕೊಬ್ಬು-ನಾರಿನ ಸಮತೋಲನವು ತೂಕ ಇಳಿಸುವುದಕ್ಕೂ ಸಹಕಾರಿ. ಈ ನಾರಿನಂಶದಿಂದ ಹೊಟ್ಟೆಯ ಆರೋಗ್ಯವೂ ಸುಧಾರಿಸಿ, ಮಲಬದ್ಧತೆಯಂಥ ಸಮಸ್ಯೆ ಶಮನವಾಗುತ್ತದೆ.
