ಉದಯವಾಹಿನಿ: ನೀವು ಅಂಗಡಿಯಲ್ಲಿ ಖರೀದಿಸುವ ಕುಡಿಯುವ ನೀರಿನ ಬಾಟಲಿಯಲ್ಲಿಯ ನೀರನ್ನು ನಿಸರ್ಗದಲ್ಲಿಯ ಪರಿಶುದ್ಧ ಬುಗ್ಗೆಗಳಿಂದ ಸಂಗ್ರಹಿಸಲಾಗಿದೆ ಎಂದು ಅದರ ಜಾಹೀರಾತು ಹೇಳುತ್ತಿರಬಹುದು, ಆದರೆ ವಾಸ್ತವವು ನಿಮ್ಮ ಊಹೆಗೂ ಮೀರಿ ಕೆಟ್ಟದ್ದಾಗಿರಬಹುದು. ಹೊಸ ಸಂಶೋಧನೆಯೊಂದು ಇದೇ ಮೊದಲ ಬಾರಿಗೆ ಇಂತಹ ಪ್ಯಾಕೇಜ್ ಬಾಟಲ್ಗಳಲ್ಲಿ ಕಣ್ಣಿಗೆ ಕಾಣದ ಸುಮಾರು ಕಾಲು ಮಿಲಿಯನ್ನಷ್ಟು ನ್ಯಾನೊಪ್ಲಾಸ್ಟಿಕ್ನ ಪುಟ್ಟ ತುಣುಕುಗಳನ್ನು ಪತ್ತೆ ಹಚ್ಚಿ ಅವುಗಳನ್ನು ವರ್ಗೀಕರಿಸಿದೆ.
ಪ್ಯಾಕೇಜ್ ಬಾಟಲಿಯಲ್ಲಿಯ ನೀರಿನಲ್ಲಿ ಸೂಕ್ಷ್ಮಪ್ಲಾಸ್ಟಿಕ್ ತುಣುಕುಗಳು ಇರುತ್ತವೆ ಎನ್ನುವುದು ಗೊತ್ತಿರುವ ರಹಸ್ಯವೇ ಆಗಿತ್ತು,ಆದರೆ ಎಷ್ಟು ಪ್ಲಾಸ್ಟಿಕ್ ತುಣುಕುಗಳಿರುತ್ತವೆ ಮತ್ತು ಅವು ಯಾವ ಬಗೆಯದು ಎನ್ನುವುದು ಗೊತ್ತಿರಲಿಲ್ಲ. ಇದೀಗ ಕೊಲಂಬಿಯಾ ವಿವಿ ಮತ್ತು ರಟ್ಲರ್ಸ್ ವಿವಿಯ ಸಂಶೋಧಕರ ಅಧ್ಯಯನವು ಅದನ್ನು ಬಹಿರಂಗಗೊಳಿಸಿದೆ.
ಪ್ರೊಸೀಡಿಂಗ್ಸ್ ಆಫ್ ನ್ಯಾಷನಲ್ ಅಕಾಡೆಮಿ ಆಫ್ ಸೈನ್ಸಸ್ನಲ್ಲಿ ಸೋಮವಾರ ಪ್ರಕಟಗೊಂಡಿರುವ ಅಧ್ಯಯನ ವರದಿಯಲ್ಲಿ ಸಂಶೋಧಕರು ಪ್ಲಾಸ್ಟಿಕ್ ಕಣಗಳ ಮಟ್ಟವು ಪ್ರತಿ ಲೀಟರ್ಗೆ 1,10,000 ದಿಂದ 4,00,000 ದ ನಡುವೆಯಿದ್ದು, ಸರಾಸರಿ ಮಟ್ಟವು ಸುಮಾರು 2,40,000ದಷ್ಟಿದೆ ಎನ್ನುವುದನ್ನು ದಾಖಲಿಸಿದ್ದಾರೆ.
ಸಂಶೋಧಕರು ತಮ್ಮ ಅಧ್ಯಯನಕ್ಕೆ ಅತ್ಯಂತ ಸೂಕ್ಷ್ಮ ಕಣಗಳನ್ನೂ ಪತ್ತೆ ಹಚ್ಚಬಲ್ಲ ಅತ್ಯಾಧುನಿಕ ಲೇಸರ್ ತಂತ್ರಜ್ಞಾನವನ್ನು ಬಳಸಿದ್ದರು. ಇದು ಬಾಟಲ್ ನೀರಿನಲ್ಲಿಯ ಪತ್ತೆ ಹಚ್ಚಬಹುದಾದ ಪ್ಲಾಸ್ಟಿಕ್ ಕಣಗಳ ಸಂಖ್ಯೆಯನ್ನು 10 ಪಟ್ಟುಗಳಿಗೂ ಅಧಿಕ ಮತ್ತು ಕೆಲವು ಸಂದರ್ಭಗಳಲ್ಲಿ ನೂರು ಪಟ್ಟುಗಳಷ್ಟು ಹೆಚ್ಚಿಸಿದೆ. ಈ ಪ್ಲಾಸ್ಟಿಕ್ ಕಣಗಳ ಹೆಚ್ಚಿನ ಭಾಗವು ಬಾಟಲಿಯಿಂದಲೇ ಉತ್ಪನ್ನಗೊಳ್ಳುತ್ತವೆ ಮತ್ತು ಉಳಿದವುಗಳಲ್ಲಿ ಹೆಚ್ಚಿನವು ಇತರ ಮಾಲಿನ್ಯಕಾರಕಗಳನ್ನು ಹೊರಗಿಡಲು ಬಳಸಲಾಗುವ ರಿವರ್ಸ್ ಒಸ್ಕೊಸಿಸ್ ಮೆಂಬ್ರೇನ್ ಫಿಲ್ಟರ್ನಿಂದ ಬರುತ್ತವೆ ಎಂದು ಅಂದಾಜಿಸಲಾಗಿದೆ. ರಿವರ್ಸ್ ಒಸ್ಕೊಸಿಸ್ ನೀರಿನ ಶುದ್ದೀಕರಣ ಪ್ರಕ್ರಿಯೆಯಾಗಿದೆ. ಸಂಶೋಧಕರು ಅಧ್ಯಯನಕ್ಕೆ ಬಳಸಿದ್ದ ಬಾಟಲ್ಡ್ ನೀರಿನ ಮೂರು ಬ್ಯಾಂಡ್ಗಳನ್ನು ಸದ್ಯಕ್ಕೆ ಬಹಿರಂಗಗೊಳಿಸಿಲ್ಲ,ಇನ್ನಷ್ಟು ಹೆಚ್ಚಿನ ಬ್ಯಾಂಡ್ಗಳನ್ನು ಅಧ್ಯಯನಕ್ಕೆ ಒಳಪಡಿಸಲು ಅವರು ಉದ್ದೇಶಿಸಿರುವುದು ಇದಕ್ಕೆ ಕಾರಣವಾಗಿದೆ. ಈ ಬ್ರಾಂಡ್ಗಳು ಸಾಮಾನ್ಯವಾಗಿ ಅಮೆರಿಕದಲ್ಲಿ ಲಭ್ಯವಿರುವ ಬ್ರಾಂಡ್ಗಳಾಗಿವೆ.
