ಉದಯವಾಹಿನಿ, ವಾಷಿಂಗ್ಟನ್: ಅಮೆರಿಕ ವಿಧಿಸಿದ ಸುಂಕ ಒತ್ತಡಕ್ಕೆ ಮಣಿದಿರುವ ಭಾರತ ಇದೀಗ ರಷ್ಯಾದಿಂದ ಕಚ್ಚಾ ತೈಲ ಆಮದು ಪ್ರಮಾಣವನ್ನು ಕಡಿಮೆ ಮಾಡಿದೆ. ಆದರೆ ಇದರಿಂದ ಭಾರತದ ತೈಲ ಅಗತ್ಯತೆಗೆ ತೊಂದರೆಯಾಗದಂತೆ ಅಮೆರಿಕವು ವೆನೆಜುವೆಲಾದ ತೈಲವನ್ನು ಭಾರತಕ್ಕೆ ನೀಡುತ್ತಿದೆ. ಇದರಿಂದ ನವದೆಹಲಿಯು ರಷ್ಯಾದ ತೈಲ ಆಮದುಗಳನ್ನು ಗಣನೀಯ ಪ್ರಮಾಣದಲ್ಲಿ ಕಡಿಮೆ ಮಾಡಿ ವೆನೆಜುವೆಲಾದಿಂದ ಕಚ್ಚಾ ತೈಲ ಖರೀದಿಯನ್ನು ನಡೆಸಲಿದೆ. ಇದರಿಂದ ಮುಂಬರುವ ತಿಂಗಳುಗಳಲ್ಲಿ ಭಾರತಕ್ಕೆ ರಷ್ಯಾ ತೈಲ ಆಮದು ಪ್ರಮಾಣವು ತೀವ್ರವಾಗಿ ಕುಸಿಯಲಿದೆ ಎನ್ನಲಾಗಿದೆ.
ರಷ್ಯಾದಿಂದ ತೈಲ ಆಮದುಗಳನ್ನು ಕಡಿಮೆ ಮಾಡಲು ಈಗಾಗಲೇ ನವದೆಹಲಿಯು ಕ್ರಮವನ್ನು ಕೈಗೊಳ್ಳುತ್ತಿದೆ. ರಷ್ಯಾ ಬದಲು ಶೀಘ್ರದಲ್ಲೇ ಅಮೆರಿಕವು ಭಾರತಕ್ಕೆ ವೆನೆಜುವೆಲಾದ ಕಚ್ಚಾ ತೈಲವನ್ನು ಒದಗಿಸಲಿದೆ. ರಷ್ಯಾದಿಂದ ತೈಲ ಆಮದಿಗೆ ಪ್ರತಿಯಾಗಿ ವಾಷಿಂಗ್ಟನ್ ಭಾರತಕ್ಕೆ ಸುಂಕಗಳನ್ನು ಹೆಚ್ಚಿಸಿದ ಪರಿಣಾಮ ಭಾರತವು ರಷ್ಯಾದ ಕಚ್ಚಾ ತೈಲ ಖರೀದಿಯನ್ನು ಕಡಿತಗೊಳಿಸುವುದಾಗಿ ಹೇಳಿತ್ತು. ಇದರಿಂದಾಗಿ ಮುಂಬರುವ ದಿನಗಳಲ್ಲಿ ಭಾರತಕ್ಕೆ ಹಲವಾರು ಲಕ್ಷ ಬ್ಯಾರೆಲ್ಗಳಷ್ಟು ರಷ್ಯಾ ತೈಲ ಆಮದು ಕಡಿತವಾಗಲಿದೆ ಎಂದು ಮೂಲಗಳು ತಿಳಿಸಿವೆ.
ಕಳೆದ ಮಾರ್ಚ್ ತಿಂಗಳಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ವೆನೆಜುವೆಲಾದ ತೈಲವನ್ನು ಖರೀದಿಸುವ ದೇಶಗಳ ಮೇಲೆ ಶೇಕಡಾ 25ರಷ್ಟು ಸುಂಕಗಳನ್ನು ವಿಧಿಸಿದರು. ಇದರ ಬಳಿಕ ಯುಎಸ್ ಪಡೆಗಳು ವೆನೆಜುವೆಲಾದ ಅಧ್ಯಕ್ಷ ನಿಕೋಲಸ್ ಮಡುರೊ ಅವರನ್ನು ಬಂಧಿಸಿತ್ತು. ಬಳಿಕ ಭಾರತಕ್ಕೆ ರಷ್ಯಾದ ತೈಲ ಆಮದು ಪ್ರಮಾಣ ಕುಸಿಯುತ್ತಿದ್ದು, ಇದರಿಂದ ಉಂಟಾಗುವ ಪೂರೈಕೆ ತೊಂದರೆಯನ್ನು ಸರಿದೂಗಿಸಲು ಅಮೆರಿಕವು ವೆನೆಜುವೆಲಾದಿಂದ ತೈಲ ಖರೀದಿಗಳನ್ನು ಪುನರಾರಂಭಿಸಬಹುದು ಎಂದು ವಾಷಿಂಗ್ಟನ್ ತಿಳಿಸಿದೆ ಎನ್ನಲಾಗಿದೆ.
