ಉದಯವಾಹಿನಿ, ಹೈದರಾಬಾದ್(ತೆಲಂಗಾಣ): ಅಡುಗೆ ಎಂಬುದು ಕಲೆ ಇದ್ದಂತೆ. ಅದರಲ್ಲೂ ಅಡುಗೆ ಮಾಡುವುದರಲ್ಲಿ ಅವರು ಪ್ರವೀಣರಾದರೆ, ಪ್ರತಿನಿತ್ಯದ ಅಡುಗೆ ಕೂಡ ಹಬ್ಬದೂಟದಂತೆ ಭಾಸವಾಗುತ್ತದೆ. ಈ ಮಾತು ಹೈದರಾಬಾದ್ನ ಪ್ರಸಿದ್ಧ ‘ಉಸ್ತಾದ್’ಗಳ (ಮಾಸ್ಟರ್ ಷೆಫ್ಗಳು) ಜೀವನಕ್ಕೆ ಸಂಪೂರ್ಣವಾಗಿ ಒಪ್ಪಿತವಾಗುತ್ತದೆ. ರಂಜಾನ್ ಆರಂಭವಾದಂತೆ ಈ ಬಾಣಸಿಗರು ನಗರದ ಜನಪ್ರಿಯ ಖಾದ್ಯವಾದ ಹಲೀಮ್ ತಯಾರಿಸುವಲ್ಲಿ ಕಾರ್ಯನಿರತರಾಗುತ್ತಾರೆ. ಅನುಭವಿ ಉಸ್ತಾದ್ಗಳಿಂದ ಕಲೆ ಕಲಿತ ಸಾವಿರಾರು ನುರಿತ ಅಡುಗೆಯವರೂ ಸಹ ಸಂಪೂರ್ಣವಾಗಿ ತೊಡಗಿಸಿಕೊಂಡಿದ್ದಾರೆ. ರಂಜಾನ್ ಸಮಯದಲ್ಲಿ ಮಾತ್ರ ಹಲೀಮ್ ಅಡುಗೆ ಹೆಚ್ಚು ಕಾಣಸಿಗುತ್ತದೆ ಎಂದು ಕೆಲವರು ನಂಬಿದ್ದಾರೆ. ಆದರೆ, ಇದಕ್ಕೆ ವರ್ಷವಿಡೀ ಬೇಡಿಕೆ ಇದೆ. ಹೈದರಾಬಾದ್ನಾದ್ಯಂತ ಮುಸ್ಲಿಂ ಮದುವೆಗಳು, ವಲೀಮಾ ಸ್ವಾಗತಗಳು, ಶುಭ ಸಂದರ್ಭಗಳು ಮತ್ತು ಮನೆಗಳಲ್ಲಿ ಸಣ್ಣ ದಾವತ್ಗಳಲ್ಲಿ ಹಲೀಮ್ ಮತ್ತು ಬಿರಿಯಾನಿ ವಿಶೇಷ ಸ್ಥಾನ ಪಡೆದಿದೆ. ಪರಿಣಾಮವಾಗಿ, ಈ ಉಸ್ತಾದ್ಗಳು ಯಾವುದೇ ಋತುಮಾನದಲ್ಲೂ ಬಿಡುವಿಲ್ಲದೆ ಕೆಲಸದಲ್ಲಿ ತೊಡಗುತ್ತಾರೆ.
ಉಸ್ತಾದ್ಗಳ ಬಳಿ ಕಲಿಕೆ: ಹಲೀಮ್ ತಯಾರಿಕೆ ಕುರಿತು ತಿಳಿಸುವ ಯಾವುದೇ ಔಪಚಾರಿಕ ಅಡುಗೆ ಶಾಲೆ ಅಥವಾ ತರಬೇತಿ ಕೇಂದ್ರವಿಲ್ಲ. ಪ್ರತಿಯೊಬ್ಬ ಕಲಿಕೆದಾರರು ಅನುಭವಿ ಉಸ್ತಾದ್ಗಳ ಬಳಿಯಲ್ಲಿ ಶಿಷ್ಯರಾಗಿ ಸೇರಿ ಕಲಿಯಲಾರಂಭಿಸುತ್ತಾರೆ. ಇದರ ತಯಾರಿಕೆಗೆ ಬೇಕಾದ ವಸ್ತು, ಬೆಂಕಿ ಉರಿಯ ನಿಯಂತ್ರಣ ಮತ್ತು ಹದವಾಗಿ ಬೇಯಿಸುವ ವಿಧಾನಗಳ ಹಲವು ವರ್ಷದ ಕಲಿಕೆ ಅವರಲ್ಲಿ ಕೌಶಲ್ಯ ಮೂಡಿಸುತ್ತದೆ. ಈ ಕೌಶಲ್ಯದ ಅನುಭವದ ಮೇರೆಗೆ ಅನೇಕ ಜನರು ಸ್ವತಂತ್ರವಾಗಿ ಆರ್ಡರ್ ಪಡೆದು ಗಳಿಕೆ ಆರಂಭಿಸುತ್ತಾರೆ. ಹೈದರಾಬಾದಿ ಅಡುಗೆಯ ಮೂಲಗಳು: ನಿಜಾಮರ ಕಾಲದಿಂದ ಹೈದರಾಬಾದ್ನಲ್ಲಿ ಸಾಂಪ್ರದಾಯಿಕವಾದ ಹಲೀಮ್ ಮತ್ತು ಬಿರಿಯಾನಿ ಆರಂಭವಾಯಿತು. ಆರಂಭದಲ್ಲಿ ಯೆಮೆನ್ ಮತ್ತು ಪರ್ಷಿಯಾದಲ್ಲಿ ರಾಜಮನೆತನದ ಅಡುಗೆ ಕೋಣೆಯಲ್ಲಿ ಕೆಲಸ ಮಾಡುವವರು ಮುಂದೆ ಆರನೇ ನಿಜಾಮ್ ಮಹಬೂಬ್ ಆಲಿ ಖಾನ್ ಕಾಲದಲ್ಲಿ ಈ ಹೊಸ ಅಡುಗೆ ಪರಿಚಯ ಮಾಡಿದರು. ಏಳನೇ ನಿಜಾಂ ಮೀರ್ ಒಸ್ಮಾನ್ ಆಲಿ ಖಾನ್ ಆಡಳಿತದಲ್ಲಿ ಈ ಅಡುಗೆ ಸಾಕಷ್ಟು ಪ್ರಖ್ಯಾತಿ ಪಡೆದು, ರಾಜರ ಅಡುಗೆಯಲ್ಲಿ ಗುರುತಿಸಿಕೊಂಡಿತು. ಇದಾದ ವರ್ಷಗಳ ಬಳಿಕ ಇದು ಹೈದರಾಬಾದ್ನ ಆಹಾರ ಸಂಸ್ಕೃತಿಯನ್ನು ಸೇರಿತು. ದಖ್ಖನಿ ಬಾಣಸಿಗರು ಇದರಲ್ಲಿ ನುರಿತರು. ಬಳಿಕ ಇದು ಪೀಳಿಗೆಯಿಂದ ಪೀಳಿಗೆಗೆ ಬಂದಿತು.
