ಉದಯವಾಹಿನಿ, ಟೆಹ್ರಾನ್(ಇರಾನ್): ಖಟ್ಟರ್ ಇಸ್ಲಾಂವಾದಿ ಮತ್ತು ಖಮೇನಿಗಳ ನಿರ್ದೇಶನದಂತೆ ನಡೆಯುವ ವಿಶೇಷ ಪಡೆಯಾದ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (ಐಆರ್ಜಿಸಿ) ಈಗ ಇಡೀ ಇರಾನ್ ಮತ್ತು ಅದರ ಸೇನೆಯನ್ನು ತನ್ನ ನಿಯಂತ್ರಣಕ್ಕೆ ಪಡೆದಿದೆ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ.
ಇರಾನ್ ಧರ್ಮಗುರು ಮೊಜ್ತಬಾ ಖಮೇನಿ ಅವರನ್ನೂ ಹಿಂದಿಕ್ಕಿ, ದೇಶದ ನೀತಿ-ನಿರ್ಧಾರಗಳನ್ನು ನಿರ್ಣಯಿಸುವ ಅಧಿಕಾರವನ್ನು ಐಆರ್ಜಿಸಿ ಕಮಾಂಡರ್ ಮೇಜರ್ ಜನರಲ್ ಅಹ್ಮದ್ ವಾಹಿದಿ ಮತ್ತು ಅವರ ಆಪ್ತ ವಲಯ ತನ್ನದಾಗಿಸಿಕೊಂಡಿದೆ ಎಂದು ವರದಿಗಳಲ್ಲಿ ಹೇಳಲಾಗಿದೆ.
ಎರಡನೇ ಸುತ್ತಿನ ಶಾಂತಿ ಸಂಧಾನಕ್ಕಾಗಿ ಪಾಕಿಸ್ತಾನಕ್ಕೆ ಬರಲು ಸಿದ್ಧ ಎಂದು ಅಮೆರಿಕ ಘೋಷಿಸಿದೆ. ಆದರೆ, ಇರಾನ್ ಇದನ್ನು ನಿರಾಕರಿಸಿದೆ. ಅದೇ ರೀತಿ, ಹಾರ್ಮುಜ್ ಜಲಮಾರ್ಗದಲ್ಲಿ ಹಡಗುಗಳ ಮೇಲೆ ಏಕಪಕ್ಷೀಯವಾಗಿ ದಾಳಿ ನಡೆಸಿದೆ. ಈ ನಡೆಯನ್ನು ಗಮನಿಸಿದರೆ, ಅಲ್ಲಿನ ಅಧ್ಯಕ್ಷರು, ಧರ್ಮಗುರು ಮತ್ತು ರಾಜತಾಂತ್ರಿಕ ಅಧಿಕಾರಿಗಳು ಎಲ್ಲ ಅಧಿಕಾರವನ್ನು ಕಳೆದುಕೊಂಡಿರುವುದನ್ನು ಸೂಚಿಸುತ್ತದೆ ಎಂದು ವಿಶ್ಲೇಷಿಸಲಾಗಿದೆ.
IRGC ಕಮಾಂಡರ್ ಹೊಸ ಸುಪ್ರೀಂ ಲೀಡರ್?: ಖಮೇನಿಗಳ ವಿಶೇಷ ಭದ್ರತಾ ಪಡೆ ಎಂದೇ ಕರೆಸಿಕೊಳ್ಳುವ ಐಆರ್ಜಿಸಿಯ ಕಮಾಂಡರ್ ಆಗಿರುವ ಅಹ್ಮದ್ ವಾಹಿದಿ ದೇಶದ ಆಡಳಿತ ಮತ್ತು ಸೇನೆಯ ನಿಯಂತ್ರಣವನ್ನು ತನ್ನದಾಗಿಸಿಕೊಂಡಿರುವ ಸಾಧ್ಯತೆಗಳಿವೆ ಎಂದು ಅಂದಾಜಿಸಲಾಗಿದೆ.
ಕಾರಣ, ಹೊಸ ಧರ್ಮಗುರು ಮೊಜ್ತಬಾ ಖಮೇನಿ ಅವರು ಎಲ್ಲೂ ಬಹಿರಂಗವಾಗಿ ಕಾಣಿಸಿಕೊಳ್ಳುತ್ತಿಲ್ಲ. ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ, ಸಂಸತ್ ಸ್ಪೀಕರ್ ಮೊಹಮ್ಮದ್ ಬಘರ್ ಗಾಲಿಬಾಫ್ ಅವರು ಅಮೆರಿಕದ ಜೊತೆ ಮೊದಲ ಸುತ್ತಿನ ಶಾಂತಿ ಮಾತುಕತೆಯಲ್ಲಿ ಭಾಗವಹಿಸಿ ಬಹಿರಂಗ ಹೇಳಿಕೆಗಳನ್ನು ನೀಡುತ್ತಿದ್ದರು. ಇದೀಗ, ಅವರ ಹೇಳಿಕೆಗಳೂ ತಗ್ಗಿವೆ. ಅಮೆರಿಕದ ಜೊತೆಗಿನ ಸಂಧಾನವನ್ನು ಇರಾನ್ ನೇರವಾಗಿ ನಿರಾಕರಿಸಿದೆ. ಈ ಎಲ್ಲ ಬೆಳವಣಿಗಳನ್ನು ಅವಲೋಕಿಸಿದರೆ ಐಆರ್ಜಿಸಿ ಇರಾನ್ ಅನ್ನು ತನ್ನ ವಶಕ್ಕೆ ಪಡೆದಿದೆ ಎಂಬುದು ತಿಳಿಯುತ್ತದೆ ಎಂದು ವಾಷಿಂಗ್ಟನ್ ಮೂಲದ ಇನ್ಸ್ಟಿಟ್ಯೂಟ್ ಫಾರ್ ದಿ ಸ್ಟಡಿ ಆಫ್ ವಾರ್ (ISW) ವಿಶ್ಲೇಷಿಸಿದೆ.
