ಉದಯವಾಹಿನಿ, ಬೆಂಗಳೂರು: ಅರ್ಧ ಬೆಲೆಗೆ ಯುಎಇ ಕರೆನ್ಸಿ ಕೊಡುವುದಾಗಿ ಕಲರ್ ಜೆರಾಕ್ಸ್ ಕಾಪಿ ಕೊಟ್ಟು ವಂಚಿಸುತ್ತಿದ್ದ ಖತರ್ನಾಕ್ ಖದೀಮನನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ದೆಹಲಿ ಮೂಲದ ಇಮ್ರಾನ್ ಶೇಕ್ ಬಂಧಿತ ಆರೋಪಿ ಯಾಗಿದ್ದು, ಕೃತ್ಯದಲ್ಲಿ ಭಾಗಿಯಾಗಿ ಪರಾರಿಯಾಗಿರುವ ಮತ್ತೋರ್ವ ಆರೋಪಿ ಪಶ್ಚಿಮ ಬಂಗಾಳ ಮೂಲದ ರುಕ್ಸಾನ ಬಂಧನಕ್ಕೆ ತೀವ್ರ ಶೋಧ ನಡೆಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಉದ್ಯಮಿಗಳು ವಿದೇಶ ಪ್ರವಾಸಕ್ಕೆ ಸಿದ್ಧತೆ ಮಾಡಿಕೊಳ್ಳುತ್ತಿರುವವರನ್ನು ಪರಿಚಯ ಮಾಡಿಕೊಳ್ಳುತ್ತಿದ್ದ ಖತರ್ನಾಕ್ ಜೋಡಿ “ತಮ್ಮ ಬಳಿ ಸಾಕಷ್ಟು ಯುಎಇ ಕರೆನ್ಸಿ ಇದ್ದು ಅದೆಲ್ಲವನ್ನೂ ವಿನಿಮಯ ( ಎಕ್ಸ್ಚೇಂಜ್) ಮಾಡಲು ಸಾಧ್ಯವಿಲ್ಲವಾದ್ದರಿಂದ ಮಾರಾಟ ಮಾಡಲು ನಿರ್ಧರಿಸಿದ್ದೇವೆ ಎಂದು ನಂಬಿಸುತ್ತಿತ್ತು. ಭಾರತೀಯ ಕರೆನ್ಸಿಯಲ್ಲಿ ಯುಎಇನ ಒಂದು ದಿರ್ಹಾಮ್ ಬೆಲೆ ಸರಿಸುಮಾರು ೨೨ ರೂ. ಆದರೆ ತಮಗೆ ೧೨ ರೂಗಳಂತೆ ಎಕ್ಸ್ಚೇಂಜ್ ಮಾಡಲು ಸಿದ್ಧವೆಂದು, ನಂಬಿಕೆ ಗಳಿಸಲು ಮೊದಲಿಗೆ ಒಂದು ಅಸಲಿ ದಿರ್ಹಾಮ್ ಕೊಟ್ಟು ಕಳಿಸುತ್ತಿದ್ದರು.
ಹಣ ಪಡೆದವರು ಅಧಿಕೃತ ಮನಿ ಎಕ್ಸ್ಚೇಂಜ್ ಸೆಂಟರಿನಲ್ಲಿ ಪರಿಶೀಲಿಸಿದಾಗ ಅಸಲಿ ಎಂದು ಹೇಳುತ್ತಿದ್ದಂತೆ ಒಂದಷ್ಟು ಹಣ ಸಿದ್ಧಮಾಡಿಕೊಂಡು ಇಮ್ರಾನ್ನನ್ನು ಭೇಟಿ ಮಾಡುತ್ತಿದ್ದರು. ಹಣ ಪಡೆಯುತ್ತಿದ್ದ ಇಮ್ರಾನ್, ಕಲರ್ ಜೆರಾಕ್ಸ್ ನೋಟುಗಳನ್ನು ಆರೋಪಿಗಳ ಕೈಗಿಟ್ಟು ಪರಾರಿಯಾಗುತ್ತಿದ್ದರು. ಯುಎಇ ಕರೆನ್ಸಿಯ ಕಲರ್ ಜೆರಾಕ್ಸ್ ವಂಚನೆ ಪ್ರಕರಣ ಬೆನ್ನತ್ತಿದ್ದ ಸಿಸಿಬಿ ಪೊಲೀಸರು, ಆರೋಪಿ ಇಮ್ರಾನ್ ಶೇಕ್ನನ್ನು ಬಂಧಿಸಿ, ಬಂಧಿತನಿಂದ ನೂರಕ್ಕೂ ಹೆಚ್ಚು ನಕಲಿ ಯುಎಇ ದಿರ್ಹಾಮ್ ಅನ್ನು ವಶಕ್ಕೆ ಪಡೆದಿದ್ದಾರೆ. ಇಮ್ರಾನ್ ಜೊತೆಗಿದ್ದ ರುಕ್ಸಾನ ಮತ್ತಷ್ಟು ನಕಲಿ ಕರೆನ್ಸಿಯೊಂದಿಗೆ ಪರಾರಿಯಾಗಿದ್ದು, ಆಕೆಯ ಪತ್ತೆಗೂ ಬಲೆ ಬೀಸಲಾಗಿದೆ.
