ಉದಯವಾಹಿನಿ , ಕೇಪ್ಟೌನ್: ಚಲಿಸುತ್ತಿರುವ ವಾಹನದ ಮೇಲಿಂದ ಸಿಂಹವೊಂದು ಕೆಳಕ್ಕೆ ಜಿಗಿದಿರುವ ಘಟನೆ ದಕ್ಷಿಣ ಆಫ್ರಿಕಾದ ವಾಯುವ್ಯ ಪ್ರದೇಶದಲ್ಲಿ ನಡೆದಿದ್ದು, ಇದರ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ. ಈ ವಿಡಿಯೊ ವೈರಲ್ ಆದ ಬೆನ್ನಲ್ಲೇ ಪ್ರಾಣಿ ಸಂರಕ್ಷಣಾ ಸಂಸ್ಥೆಗಳು ಅಧಿಕಾರಿಗಳನ್ನು ಪ್ರಶ್ನಿಸುತ್ತಿವೆ. ಕಾಡು ಪ್ರಾಣಿಗಳ ಸ್ಥಳಾಂತರದ ಸಮಯದಲ್ಲಿ ಅವುಗಳ ಸುರಕ್ಷತೆ ಮತ್ತು ಭದ್ರತೆಯ ಬಗ್ಗೆ ಸಂಸ್ಥೆಯು ಕಳವಳ ವ್ಯಕ್ತಪಡಿಸಿವೆ.ಫ್ರೀ ಸ್ಟೇಟ್ನಿಂದ ಗಂಡು ಸಿಂಹವನ್ನು ವಾಯುವ್ಯದ ರಾಮೋತ್ಶೆರೆ ಮೊಯಿಲೋವಾ ಪ್ರದೇಶದ ನೀಟ್ವರ್ಡಿಯಂಡ್ನಲ್ಲಿರುವ ಬೇಟೆ ಫಾರ್ಮ್ಗೆ ತರಲಾಯಿತು. ಅದು ನೆಲಕ್ಕೆ ಹಾರುವ ಸ್ವಲ್ಪ ಸಮಯದ ಮೊದಲು ಚಲಿಸುತ್ತಿರುವ ವ್ಯಾನ್ನಲ್ಲಿ ನಿಂತಿರುವುದನ್ನು ಕ್ಯಾಮರಾದಲ್ಲಿ ಸೆರೆಹಿಡಿಯಲಾಗಿದೆ. ನೋಡ ನೋಡುತ್ತಿದ್ದಂತೆ ಸಿಂಹವು ರಸ್ತೆಗೆ ಜಿಗಿದಿದೆ.
ಲಿಚ್ಟೆನ್ಬರ್ಗ್ ಪ್ರಾಣಿ ಆಸ್ಪತ್ರೆಯ ಡಾ. ಆಂಟನ್ ನೆಲ್ ಅವರನ್ನು ಒಳಗೊಂಡ ತಂಡವು ಅಂತಿಮವಾಗಿ ಸಿಂಹವನ್ನು ಸುರಕ್ಷಿತವಾಗಿ ಸೆರೆಹಿಡಿಯಿತು. ಸಿಂಹಕ್ಕೆ ಸಣ್ಣ-ಪುಟ್ಟ ಗಾಯಗಳಾಗಿವೆ ಎಂದು ತೋರುತ್ತಿದ್ದರೂ, ಈ ಘಟನೆಯು ದಕ್ಷಿಣ ಆಫ್ರಿಕಾದಲ್ಲಿ ಪರಭಕ್ಷಕ ಪ್ರಾಣಿಗಳ ವಾಣಿಜ್ಯ ಮಾರಾಟ ಮತ್ತು ಸಾಗಣೆಯಲ್ಲಿನ ಗಂಭೀರ ಸಮಸ್ಯೆಗಳನ್ನು ಎತ್ತಿ ತೋರಿಸುತ್ತದೆ ಎಂದು ತಜ್ಞರು ಹೇಳಿದ್ದಾರೆ. ದಕ್ಷಿಣ ಆಫ್ರಿಕಾದ ಫೋರ್ ಪಾವ್ಸ್ ಸಂಸ್ಥೆಯ ನಿರ್ದೇಶಕಿ ಫಿಯೋನಾ ಮೈಲ್ಸ್, ಘಟನೆಯ ಬಗ್ಗೆ ತಮಗೆ ತಿಳಿದಿದೆ ಎಂದು ದೃಢಪಡಿಸಿದರು. ಈ ಪ್ರಕರಣದ ಬಗ್ಗೆ ಮತ್ತು ವನ್ಯಜೀವಿ ಸಾಗಣೆ ನಿಯಮಗಳ ಅನುಸರಣೆಯ ಬಗ್ಗೆ ತನಿಖೆ ಆರಂಭಿಸುವ ಸರ್ಕಾರದ ತ್ವರಿತ ನಿರ್ಧಾರವನ್ನು ನಾವು ಸ್ವಾಗತಿಸುತ್ತೇವೆ ಎಂದು ಅವರು ಹೇಳಿದ್ದಾರೆ.
