ಉದಯವಾಹಿನಿ, ಕಾಶ್ಮೀರ -ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆದ ದೇಶೀಯ ಲೀಗ್ ಪಂದ್ಯದ ವೇಳೆ ಕ್ರಿಕೆಟಿಗನೊಬ್ಬ ಪ್ಯಾಲೆಸ್ಟೀನಿಯನ್ ಧ್ವಜ ಬಳಸಿದ್ದು ಭಾರೀ ವಿವಾದ ಭುಗಿಲೆದ್ದಿದೆ. ಜಮ್ಮು ಮತ್ತು ಕಾಶ್ಮೀರ ಚಾಂಪಿಯನ್ಸ್ ಲೀಗ್ನಲ್ಲಿ ಪಂದ್ಯ ಆಡುವಾಗ ಫುರ್ಖಾನ್ ಭಟ್ ತಮ್ಮ ಹೆಲ್ಮೆಟ್ನಲ್ಲಿ ಪ್ಯಾಲೆಸ್ಟೀನಿಯನ್ ಧ್ವಜ ಬಳಸಿಕೊಂಡಿದ್ದರು. ಈ ಕೃತ್ಯಕ್ಕೆ ಸಂಬಂಧಿಸಿದಂತೆ ಜಮ್ಮು ಗ್ರಾಮೀಣ ಪೊಲೀಸರು ಅವರನ್ನು ವಿಚಾರಣೆಗೆ ಒಳಪಡಿಸಿದ್ದಾರೆ.
ಇದಲ್ಲದೆ, ಲೀಗ್ನ ಸಂಘಟಕ ಜಾಹಿದ್ ಭಟ್ ಮತ್ತು ಪಂದ್ಯಕ್ಕೆ ಮೈದಾನ ಒದಗಿಸಿದ ವ್ಯಕ್ತಿಯನ್ನು ಸಹ ಪ್ರಶ್ನಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ. ಗುರುವಾರ ನಡೆದಿದ್ದ ಜಮ್ಮು ಟ್ರೈಲ್ಬ್ಲೇಜರ್ಸ್ ವಿರುದ್ಧದ ಪಂದ್ಯದ ಸಮಯದಲ್ಲಿ ಜಾಹಿದ್ ಸ್ಥಳೀಯ ಜೆಕೆ 11 ತಂಡವನ್ನು ಪ್ರತಿನಿಧಿಸಿದ್ದರು. ಅವರು ಪ್ಯಾಲೆಸ್ಟೀನಿಯನ್ ಧ್ವಜ ಬಳಸಿ ಆಡುತ್ತಿರುವ ವಿಡಿಯೊ ಕೂಡ ವೈರಲ್ ಆಗಿದೆ.ಇಸ್ರೇಲ್ ಮತ್ತು ಗಾಜಾ ಪಟ್ಟಿಯನ್ನು ಆಳುವ ಸಶಸ್ತ್ರ ಗುಂಪಾದ ಹಮಾಸ್ ನಡುವೆ ಕದನ ವಿರಾಮದ ತಿಂಗಳುಗಳ ನಂತರ, ಪ್ಯಾಲೆಸ್ಟೀನಿಯನ್ನರ ರಾಜ್ಯತ್ವದ ಬೇಡಿಕೆಯನ್ನು ಬೆಂಬಲಿಸಿ, ಪ್ರಪಂಚದಾದ್ಯಂತ ಪ್ರತಿಭಟನೆಗಳು ಮುಂದುವರಿದಂತೆ ಜಮ್ಮು ವಿವಾದ ಭುಗಿಲೆದ್ದಿದೆ. ಗಾಜಾದಲ್ಲಿ ತೀವ್ರ ಆಹಾರ ಅಭದ್ರತೆ ಮತ್ತು ಜೀವರಕ್ಷಕ ಔಷಧಿಗಳ ಕೊರತೆ ಎದುರಾಗಿರುವುದರಿಂದ ಪ್ರತಿಭಟನೆಗಳು ತೀವ್ರಗೊಂಡಿವೆ.
