ಉದಯವಾಹಿನಿ, ವಿಶ್ವದಾದ್ಯಂತದಿಂದ ಬಂದ 1200 ಚಿತ್ರಗಳೊಳಗೆ ಆಯ್ಕೆಯಾದ ಏಕೈಕ ಕನ್ನಡ ಚಿತ್ರವಾಗಿ ‘ವನ್ಯ’ ಚಲನಚಿತ್ರ 24ನೇ ಪುಣೆ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (PIFE) ಯಶಸ್ವಿ ಪ್ರದರ್ಶನಗೊಂಡು ಗಮನಸೆಳೆದಿದೆ.
ಮಹಾರಾಷ್ಟ್ರದ ಅಧಿಕೃತ ಚಲನಚಿತ್ರ ವೇದಿಕೆಯಾದ ಈ ಮಹೋತ್ಸವದಲ್ಲಿ ಇಂಡಿಯನ್ ಸಿನೆಮಾ ವಿಭಾಗದಲ್ಲಿ ನಿರ್ದೇಶಕ ಬಡಿಗೇರ್ ದೇವೇಂದ್ರ ನಿರ್ದೇಶನದ ವನ್ಯ ಚಲನಚಿತ್ರ ಶುಕ್ರವಾರ ಪ್ರದರ್ಶನಗೊಂಡು ಪ್ರೇಕ್ಷಕರಿಂದ ಮೆಚ್ಚುಗೆ ಪಡೆಯಿತು.
ತಾನಿದ್ದ ಕಾಡಿನಲ್ಲಿಯೇ ಉಳಿಯಲು ಒಬ್ಬ ವೃದ್ಧ ವ್ಯಕ್ತಿ ನಡೆಸುವ ಹೋರಾಟದ ಕಥೆಯನ್ನು ನಿರ್ದೇಶಕ ದೇವೇಂದ್ರ ಬಡಿಗೇರ ನಿರೂಪಿಸಿರುವ ರೀತಿ ಕಂಡು ಪ್ರೇಕ್ಷಕರು ಅಭಿಮಾನದ ಮಾತುಗಳನ್ನಾಡಿದ್ದಾರೆ. ಎಲ್ಲಾ ವಯೋಮಾನದ ಪ್ರೇಕ್ಷಕರು ನಕ್ಕು, ಅತ್ತೂ, ಕೈತಟ್ಟಿ, ಪ್ರೇರಣೆಯಿಂದ ಹೊರಟರು. ಅರಾವಳಿ ಸಂಕಟದ ನಡುವೆ ‘ವನ್ಯ’ ದಂತಹ ಚಿತ್ರ ಇಂದು ಇನ್ನಷ್ಟು ಅಗತ್ಯವಿದೆ ಎಂದು ಹೇಳುತ್ತಾ, ಪುಣೆ ಸುತ್ತಮುತ್ತಲ ಕಾರ್ಯಕರ್ತರನ್ನು ಸಮಾನ ಹೋರಾಟಗಳಿಗೆ ಪ್ರೇರೇಪಿಸಿದೆ ಎಂದು ಪ್ರೇಕ್ಷಕರು ಹೇಳಿದರು.
ಜನವರಿ 15ರಂದು ‘ಲಾ ಗ್ರಾಜಿಯಾ’ ಚಿತ್ರದೊಂದಿಗೆ ಆರಂಭವಾಗಿ ಈ ವಾರಪೂರ್ತಿ ನಡೆಯುವ ಉತ್ಸವದಲ್ಲಿ ನಿರ್ದೇಶಕ ಬಡಿಗೇರ ದೇವೇಂದ್ರ, ಕಾರ್ಯಕಾರಿ ನಿರ್ಮಾಪಕ ಪ್ರಯಾಗ ಹೊದಿಗೆರೆ, ಕಲಾವಿದರಾದ ಯಶ್ವವಂತ ಕುಚಬಾಳ, ಶಂಕರ ಪಾಗೋಜಿ ಸಕ್ರಿಯವಾಗಿ ಭಾಗವಹಿಸುತ್ತಿದ್ದಾರೆ.
ಶತಮಾನೋತ್ಸವ ಗೌರವಗಳು: PIFF ನಲ್ಲಿ ದಿಗ್ಗಜರಿಗೆ ಗೌರವ ಸಲ್ಲಿಸಲಾಗುತ್ತಿದೆ: ಗುರು ದತ್ ಅವರ 100ನೇ ಜನ್ಮಶತಮಾನೋತ್ಸವ, ರಿತ್ವಿಕ್ ಘಟಕ್ ಅವರ ಸ್ಮರಣೆ, ಹಾಗೂ ವಿ. ಶಾಂತರಾಮ್ ಅವರ 125ನೇ ಜನ್ಮಶತಮಾನೋತ್ಸವ. ಮಹಾರಾಷ್ಟ್ರದ ಸಾಂಸ್ಕೃತಿಕ ಕೇಂದ್ರವಾದ ಪುಣೆ ನಗರವು ಚಲನಚಿತ್ರ ಪ್ರೇಮದಿಂದ ಕಂಗೊಳಿಸುತ್ತಿದ್ದು, 25ನೇ ಆವೃತ್ತಿಯ ರಜತ ಮಹೋತ್ಸವದತ್ತ ವರ್ಷಪೂರ್ತಿ ನಡೆಯುವ ಕಾರ್ಯಕ್ರಮಗಳಿಗೆ ಸಜ್ಜಾಗಿದೆ.
ವಿಶ್ವದಾದ್ಯಂತ ಪ್ರತಿಧ್ವನಿಸುತ್ತಿರುವ ಈ ಕನ್ನಡ ರತ್ನ ಜನವರಿ 19ರಂದು ಮತ್ತೆ ಪ್ರದರ್ಶಿಸಲಾಗುತ್ತದೆ. ಪುಣೆಯ ಭಾಗದಲ್ಲಿರುವ ಪ್ರೇಕ್ಷಕರು ಚಿತ್ರವನ್ನು ವೀಕ್ಷಿಸುವಂತೆ ನಿರ್ದೇಶಕ ಬಡಿಗೇರ ದೇವೇಂದ್ರ ಮನವಿ ಮಾಡಿದ್ದಾರೆ.
