ಹಾನಿಗೊಳಗಾದ ಮನೆಗಳಿಗೆ ತಕ್ಷಣ ಪರಿಹಾರ ನೀಡಲು ಸೂಚನೆ; ಡಾ.ಅವಿನಾಶ ಜಾಧವ

ಉದಯವಾಹಿನಿ,ಚಿಂಚೋಳಿ: ಕಳೆದ ಕೆಲದಿನಗಳಿಂದ ನಿರಂತರವಾಗಿ ಸುರಿಯುತ್ತಿರುವ ಮಳೆಯಿಂದ ಹಾನಿಗೊಳಗಾದ ಮನೆಗಳಿಗೆ ತಕ್ಷಣ ಪರಿಹಾರ ನೀಡುವಂತೆ ಶಾಸಕ ಡಾ.ಅವಿನಾಶ ಜಾಧವ ಸಂಬಂಧಪಟ್ಟ ಅಧಿಕಾರಿಗಳಿಗೆ ಸೂಚಿಸಿದರು.ತಾಲ್ಲೂಕಿನ ಗಾರಂಪಳ್ಳಿ,ಕನಕಪೂರ,ತಾದಲಾಪುರ,ಗ್ರಾಮಗಳಿಗೆ ತೆರಳುವ ಸೇತುವೆಗಳು ಜಲಾವೃತವಾಗಿ ಮನೆಗಳಿಗೆ ನೀರು ನುಗ್ಗಿ ಹಾನಿಯಾದ ಗ್ರಾಮಗಳಿಗೆ ತಾಲ್ಲೂಕಾ ಮಟ್ಟದ ಅಧಿಕಾರಿಗಳೊಂದಿಗೆ ಭೇಟಿ ನೀಡಿ ಅಧಿಕಾರಿಗಳಿಂದ ಮಾಹಿತಿ ಪಡೆದುಕೊಂಡರು.ತದನಂತರ ಮಾತನಾಡಿದ ಅವರು,ಗ್ರಾಮಸ್ಥರು ಸೇತುವೆ ಮೇಲ್ದರ್ಜೆಗೆರಿಸುವಂತೆ ಬೇಡಿಕೆಯಿದೆ,ಈಗಾಗಲೇ ಸೇತುವೆಗಳು ಮೇಲ್ದರ್ಜೆಗೆರಿಸಲು ಕ್ರೀಯಾಯೋಜನೆ ಸಿದ್ದಪಡಿಸಲಾಗಿದೆ ಟೆಂಡರ್ ಹಂತದಲ್ಲಿವೆ ಆದಷ್ಟೂ ಶೀಘ್ರದಲ್ಲೇ ಸೇತುವೆಗಳು ನಿರ್ಮಾಣ ಮಾಡಲಾಗುವುದು.

ಹವಾಮಾನ ಇಲಾಖೆಯು ಇನ್ನೂ ಮಳೆಯಾಗುವ ಮುನ್ಸೂಚನೆ ನೀಡಿದ್ದು ನದಿಯ ಸಮೀಪ ಇರುವ ಗ್ರಾಮದ ಜನರು ಯಾರೂ ಬಟ್ಟೆ ಓಗೆಯಲು,ದನಕರುಗಳು ಮೇಯಿಸಲು ಹೋಗಬಾರದು ಮುನ್ನೆಚ್ಚರಿಕೆ ಕ್ರಮ ವಹಿಸಬೇಕು ಎಂದು ಹೇಳಿದರು.