ಉದಯವಾಹಿನಿ, ರಾಗಿ ಗಂಜಿ ಹಾಗೂ ರಾಗಿ ಅಂಬಲಿ ಎರಡೂ ‘ಫಿಂಗರ್ ಮಿಲ್ಲೆಟ್’ (ರಾಗಿ) ನಿಂದ ತಯಾರಿಸಿದ ಸಾಂಪ್ರದಾಯಿಕ ದಕ್ಷಿಣ ಭಾರತದ ಪಾನೀಯ ಇದು ಒಂದಾಗಿದೆ. ಬೇಸಿಗೆಯ ತಿಂಗಳುಗಳಲ್ಲಿ ದೇಹವನ್ನು ತಂಪಾಗಿಡಲು ಸಹಾಯ ಮಾಡುವುದರಿಂದ ರಾಗಿ ಗಂಜಿ ವಿಶೇಷವಾಗಿ ಜನಪ್ರಿಯವಾಗಿದೆ. ರಾಗಿಯನ್ನು ಹೆಚ್ಚು ಪೌಷ್ಟಿಕ ಆಹಾರವೆಂದು ಪರಿಗಣಿಸಲಾಗುತ್ತದೆ. ಜೀರ್ಣಕ್ರಿಯೆಯ ಆರೋಗ್ಯಕ್ಕೂ ಅತ್ಯಂತ ಪ್ರಯೋಜನಕಾರಿ. ಬೇಸಿಗೆಯಲ್ಲಿ ಹೇಳಿ ಮಾಡಿಸಿದ ಪಾನೀಯ ಅಂದ್ರೆ ಅದುವೇ ರಾಗಿ ಗಂಜಿ. ಇದು ಎಲ್ಲಾ ವಯಸ್ಸಿನ ಜನರಿಗೆ ಹೊಂದುವಂತಹ ತಂಪು ಪಾನಯವಾಗಿದೆ.
ರಾಗಿಯಲ್ಲಿ ಫೈಬರ್ ಹಾಗೂ ಕ್ಯಾಲ್ಸಿಯಂ ಸಮೃದ್ಧವಾಗಿದೆ. ಇದು ಮೂಳೆ ಆರೋಗ್ಯಕ್ಕೆ ಹಾಗೂ ಮತ್ತು ಜೀರ್ಣಕ್ರಿಯೆಗೆ ಅಪಾರ ಪ್ರಯೋಜನಕಾರಿಯಾಗಿದೆ. ಮಕ್ಕಳು ಮತ್ತು ಮಧುಮೇಹದಿಂದ ಬಳಲುತ್ತಿರುವ ವ್ಯಕ್ತಿಗಳಿಗೆ ಅತ್ಯುತ್ತಮವಾಗಿದೆ. ಆರೋಗ್ಯಕರ ಉತ್ತಮ ಆಹಾರದ ಆಯ್ಕೆಯಲ್ಲಿ ಪ್ರಥಮ ಸ್ಥಾನದಲ್ಲಿ ಬರುತ್ತದೆ. ಬೇಸಿಗೆಯ ಋತುವಿನಲ್ಲಿ ನಿಯಮಿತವಾಗಿ ಈ ಪಾನೀಯವನ್ನು ಸೇವಿಸಬೇಕು ಎಂದು ಆರೋಗ್ಯ ತಜ್ಞರು ಸಲಹೆ ನೀಡುತ್ತಾರೆ. ದೇಹ ಮತ್ತು ಮನಸ್ಸನ್ನು ತಂಪಾಗಿಸುವ ರಿಫ್ರೆಶ್ ಪಾನೀಯ ರಾಗಿ ಅಂಬಲಿಯನ್ನು ತಯಾರಿಸುವುದು ಹೇಗೆ ಎಂಬುದನ್ನು ತಿಳಿಯೋಣ.
ರಾಗಿ ಅಂಬಲಿ ಬೇಕಾಗುವ ಪದಾರ್ಥಗಳು:
ರಾಗಿ ಹಿಟ್ಟು- 2 ಚಮಚ
ನೀರು
ಮಜ್ಜಿಗೆ
ಉಪ್ಪು (ರುಚಿಗೆ ತಕ್ಕಷ್ಟು)
ಬೆಲ್ಲ ಅಥವಾ ಸಕ್ಕರೆ
ರಾಗಿ ಅಂಬಲಿ ತಯಾರಿಸುವ ವಿಧಾನ:
ಸಖತ್ ರುಚಿಕರವಾದ ತಂಪು ಪಾನೀಯ ರಾಗಿ ಅಂಬಲಿ ಸಿದ್ಧಪಡಿಸಲು ಮೊದಲಿಗೆ, ಒಂದು ಸಣ್ಣ ಬಟ್ಟಲಿನಲ್ಲಿ 2 ಚಮಚ ರಾಗಿ ಹಿಟ್ಟನ್ನು ಅರ್ಧ ಕಪ್ ನೀರಿನೊಂದಿಗೆ ಬೆರೆಸಿ. ಯಾವುದೇ ಉಂಡೆಗಳು ಇಲ್ಲದಂತೆ ಸರಿಯಾಗಿ ಕಲಿಸಿಕೊಳ್ಳಬೇಕಾಗುತ್ತದೆ. ಒಂದು ಚಮಚದೊಂದಿಗೆ ಚೆನ್ನಾಗಿ ಬೆರೆಸಿ.
ಉಳಿದ ನೀರನ್ನು (1 ರಿಂದ 1.5 ಕಪ್) ಆಳವಾದ ಪ್ಯಾನ್ನಲ್ಲಿ ಕುದಿಸಿ. ರಾಗಿ ಮಿಶ್ರಣವನ್ನು ಕುದಿಯುವ ನೀರಿಗೆ ನಿಧಾನವಾಗಿ ಸುರಿಯಿರಿ, ಪ್ಯಾನ್ನ ಕೆಳಭಾಗಕ್ಕೆ ಅಂಟಿಕೊಳ್ಳದಂತೆ ನಿರಂತರವಾಗಿ ಬೆರೆಸಿ.
ಉರಿಯನ್ನು ಕಡಿಮೆ ಮಾಡಿ ಮತ್ತು ಮಿಶ್ರಣವನ್ನು 5ರಿಂದ 7 ನಿಮಿಷಗಳ ಕಾಲ ಅದು ದಪ್ಪವಾಗುವವರೆಗೆ ಹಾಗೂ ಹೊಳಪು ಕಾಣಿಸಿಕೊಳ್ಳುವವರೆಗೆ ಬೇಯಿಸಬೇಕಾಗುತ್ತದೆ.
ಒಲೆ ಆಫ್ ಮಾಡಿ ಮತ್ತು ಮಿಶ್ರಣವನ್ನು ಸಂಪೂರ್ಣವಾಗಿ ತಣ್ಣಗಾಗಲು ಬಿಡಿ.
ಖಾರದ ರಾಗಿ ಅಂಬಲಿಗೆ: ಬೇಯಿಸಿದ ರಾಗಿ ಮಿಶ್ರಣಕ್ಕೆ ಮೊಸರು, ನುಣ್ಣಗೆ ಕತ್ತರಿಸಿದ ಈರುಳ್ಳಿ (ಐಚ್ಛಿಕ), ತಾಜಾ ಹಸಿರು ಕೊತ್ತಂಬರಿ ಸೊಪ್ಪು, ಒಂದು ಚಿಟಿಕೆ ಹುರಿದ ಜೀರಿಗೆ ಪುಡಿ ಹಾಗೂ ಉಪ್ಪು ಸೇರಿಸಿ.
ಸಿಹಿ ರಾಗಿ ಅಂಬಲಿಗೆ: ಬೇಯಿಸಿದ ರಾಗಿ ಮಿಶ್ರಣಕ್ಕೆ ಬೆಲ್ಲ (ಅಥವಾ ಸಕ್ಕರೆ) ಹಾಗೂ ಏಲಕ್ಕಿ ಪುಡಿ ಸೇರಿಸಿ. ಬಯಸಿದಲ್ಲಿ ಸ್ವಲ್ಪ ಹಾಲು ಕೂಡ ಸೇರಿಸಬಹುದು.
