ಉದಯವಾಹಿನಿ, ಕೋಟಾ (ರಾಜಸ್ಥಾನ): ದೀರ್ಘಾವಧಿಯ ಅಧ್ಯಯನದ ಮೇಲೆ ಕೇಂದ್ರೀಕರಿಸುವ ಬದಲು, ಪರಿಕಲ್ಪನೆಗಳನ್ನು ಅರ್ಥಮಾಡಿಕೊಳ್ಳುವುದು, ಸ್ವಯಂ ವಿಶ್ಲೇಷಣೆ, ನಿರಂತರ ಪರಿಷ್ಕರಣೆ ಮತ್ತು ಶಿಸ್ತಿನ ತಯಾರಿಯ ಮೇಲೆ ಸ್ಪಷ್ಟ ಗಮನವು ವ್ಯತ್ಯಾಸ ಉಂಟುಮಾಡಿತು ಎಂದು ಜೆಇಇ ಮುಖ್ಯ ಪರೀಕ್ಷೆ 2026 ರ ಟಾಪರ್ ಕಬೀರ್ ಚಿಲ್ಲರ್ ಹೇಳಿದರು.
ಹರಿಯಾಣದ ನಿವಾಸಿಯಾದ ಕಬೀರ್, ಕಳೆದ ಎರಡು ವರ್ಷಗಳಿಂದ ರಾಜಸ್ಥಾನದ ಕೋಟಾದ ಖಾಸಗಿ ಕೋಚಿಂಗ್ ಸಂಸ್ಥೆಯಲ್ಲಿ ಓದುತ್ತಿದ್ದಾರೆ, ಜಂಟಿ ಪ್ರವೇಶ ಪರೀಕ್ಷೆ ಮುಖ್ಯ (JEE MAIN) 2026 ರಲ್ಲಿ ಅಖಿಲ ಭಾರತ 1 ನೇ ರ್ಯಾಂಕ್ ಗಳಿಸಿದ್ದಾರೆ. ಅದರ ಫಲಿತಾಂಶಗಳನ್ನು ಸೋಮವಾರ (ಎಪ್ರಿಲ್ 20) ಪ್ರಕಟಿಸಲಾಗಿದೆ.
ಜನವರಿಯಲ್ಲಿ ನಡೆದಿದ್ದ ಪರೀಕ್ಷೆಗೆ ಹಾಜರಾಗಿ 300/300 ಅಂಕಗಳನ್ನು ಗಳಿಸಿದ್ದು, ಇಡೀ ದೇಶಕ್ಕೆ ಫಸ್ಟ್ ರ್ಯಾಂಕ್ ಪಡೆದಿದ್ದಾರೆ.
ಅವರು ಪ್ರಸ್ತುತ ಮುಂಬೈನಲ್ಲಿ ಒಲಿಂಪಿಯಾಡ್ ತರಬೇತಿ ಶಿಬಿರದಲ್ಲಿ ಭಾಗವಹಿಸಿದ್ದು, ಟಾಪರ್ ವಿಡಿಯೋ ಸಂದೇಶವನ್ನು ಹಂಚಿಕೊಂಡಿದ್ದಾರೆ. ಇದರಲ್ಲಿ ತಮ್ಮ ಯಶಸ್ಸಿಗೆ ಅವರು ಅನುಸರಿಸಿದ ಶಿಸ್ತಿನ ಅಧ್ಯಯನ ವಿಧಾನದ ಜೊತೆಗೆ ಅವರ ಶಿಕ್ಷಕರ ಮಾರ್ಗದರ್ಶನದ ಕಡೆ ಗಮನ ನೀಡಿದ್ದರು ಅನ್ನೋದನ್ನು ಹೇಳಿಕೊಂಡಿದ್ದಾರೆ. “ನನ್ನ ಯಶಸ್ಸಿನ ಹಿಂದಿನ ಪ್ರಮುಖ ಕಾರಣ ನನ್ನ ಅಧ್ಯಾಪಕರು ನೀಡಿದ ಮಾರ್ಗದರ್ಶನ. ಅಲ್ಲದೆ, ನಾನು ನನ್ನ ಅಧ್ಯಯನಕ್ಕೆ ಒಂದು ವಿಶಿಷ್ಟ ವಿಧಾನವನ್ನು ಅಳವಡಿಸಿಕೊಂಡಿದ್ದೆ. ಸ್ವಯಂ ಅಧ್ಯಯನ ಸಮಯದಲ್ಲಿ, ನನ್ನ ಗಮನದ ವ್ಯಾಪ್ತಿ ಮತ್ತು ಕಲಿಕೆಯ ಗುಣಮಟ್ಟ ಎರಡಕ್ಕೂ ನಾನು ಆದ್ಯತೆ ನೀಡಿದ್ದೆ. ನಾನು ದೀರ್ಘಕಾಲ ಅಧ್ಯಯನ ಮಾಡಲಿಲ್ಲ” ಎಂದು ಕಬೀರ್ ಹೇಳಿದರು.
ಪ್ರತಿ ಪರೀಕ್ಷೆಯ ನಂತರ ಸ್ವಯಂ ವಿಶ್ಲೇಷಣೆಯು ನನ್ನ ನಿಖರತೆ ಮತ್ತು ಸಮಯ ನಿರ್ವಹಣಾ ಕೌಶಲ್ಯಗಳನ್ನು ಹೇಗೆ ಸುಧಾರಿಸಿತು ಎಂಬುದನ್ನು ಟಾಪರ್ ವಿವರಿಸಿದ್ದು, “ಪ್ರತಿ ಪರೀಕ್ಷೆಯ ನಂತರ, ನಾನು ನನ್ನ ತಪ್ಪುಗಳನ್ನು ವಿಶ್ಲೇಷಿಸಿದೆ ಮತ್ತು ನನ್ನಲ್ಲಿ ನ್ಯೂನತೆಗಳಿದ್ದ ನಿರ್ದಿಷ್ಟ ಕ್ಷೇತ್ರಗಳ ಮೇಲೆ ಹೆಚ್ಚೆಚ್ಚು ಗಮನ ಕೇಂದ್ರೀಕರಿಸಿದೆ. ಅದು ನನಗೆ ಬಹಳಷ್ಟು ಸುಧಾರಿಸಿಕೊಳ್ಳಲು ಸಹಾಯ ಮಾಡಿತು” ಎಂದು ಕಬೀರ್ ತಮ್ಮ ಸಾಧನೆಯ ಗುಟ್ಟನ್ನು ಬಿಚ್ಚಿಟ್ಟರು.
ಕಬೀರ್ ಪರೀಕ್ಷೆಯ ಮೊದಲು ತಮ್ಮ ಅಧ್ಯಯನ ತಂತ್ರವನ್ನು ಉತ್ತಮಪಡಿಸಿಕೊಂಡರು ಮತ್ತು ನಿಯಮಿತವಾಗಿ ಅಣಕು ಪರೀಕ್ಷೆಗಳನ್ನು ತೆಗೆದುಕೊಂಡ ಬಗ್ಗೆ ಹೇಳಿದರು. “ನಾನು ಪ್ರತಿ ಪತ್ರಿಕೆಯನ್ನು ಸಂಪೂರ್ಣವಾಗಿ ವಿಶ್ಲೇಷಿಸಿದೆ, ಅದು ಕ್ರಮೇಣ ನನ್ನ ನಿಖರತೆ ಮತ್ತು ಸಮಯ ನಿರ್ವಹಣೆ ಎರಡನ್ನೂ ಸುಧಾರಿಸಿತು. ಪರಿಕಲ್ಪನೆಯ ಸ್ಪಷ್ಟತೆ ಅತ್ಯಂತ ಮುಖ್ಯವಾದ ವಿಷಯ. ಕಂಠಪಾಠ ಮಾಡುವ ಬದಲು, ಪ್ರತಿಯೊಂದು ವಿಷಯವನ್ನು ಅರ್ಥಮಾಡಿಕೊಳ್ಳುವುದು ಮತ್ತು ಅದನ್ನು ಅನ್ವಯಿಸುವುದು ನನ್ನ ದೊಡ್ಡ ಶಕ್ತಿಯಾಯಿತು” ಎಂದು ಅವರು ವಿವರಿಸಿದರು.
