ಉದಯವಾಹಿನಿ, ಲಂಡನ್: ಬ್ರಿಟನ್ನ ರಾಷ್ಟ್ರೀಯ ಭದ್ರತಾ ದಳ ನಡೆಸಿದ ಕಾರ್ಯಾಚರಣೆಯಲ್ಲಿ ರಷ್ಯಾದ ಭದ್ರತಾ ಭದ್ರತಾ ಸೇವೆಗಳಿಗಾಗಿ ಕೆಲಸ ಮಾಡುತ್ತಿದ್ದ ಆರೋಪದ ಮೇಲೆ ಮೂವರು ಶಂಕಿತ ಗೂಢಚಾರರನ್ನು ಬ್ರಿಟನ್ನಲ್ಲಿ ಬಂಧಿಸಿದ ಘಟನೆ ನಡೆದಿದೆ.
ಈ ಮೂವರೂ ಬಲ್ಗೇರಿಯನ್ ಪ್ರಜೆಗಳಾಗಿದ್ದು ರಶ್ಯನ್ ಭದ್ರತಾ ಸಂಸ್ಥೆಗಳ ಪರ ಕೆಲಸ ಮಾಡುತ್ತಿದ್ದ ಆರೋಪದಲ್ಲಿ ಬಂಧಿಸಲಾಗಿದೆ. ಬಂಧಿತರನ್ನು ಓರ್ಲಿನ್ ರುಸೋವ್, ಬಿಝರ್ ಝಂಬಜೋವ್ ಹಾಗೂ ಕ್ಯಾಥ್ರಿನ್ ಇವನೋವಾ ಎಂದು ಗುರುತಿಸಲಾಗಿದೆ. ಇವರ ಬಳಿ ಬ್ರಿಟನ್, ಬಲ್ಗೇರಿಯಾ, ಫ್ರಾನ್ಸ್ ಸೇರಿದಂತೆ ೯ ದೇಶಗಳ ನಕಲಿ ಪಾಸ್ಪೋರ್ಟ್, ಗುರುತು ಪತ್ರ ಸೇರಿದಂತೆ ನಕಲಿ ದಾಖಲೆಪತ್ರಗಳು ಪತ್ತೆಯಾಗಿದೆ ಎನ್ನಲಾಗಿದೆ. ಮೆಟ್ರೊಪಾಲಿಟನ್ ಪೊಲೀಸರ ಭಯೋತ್ಪಾದನೆ ನಿಗ್ರಹ ದಳದವರು ‘ಸರಕಾರದ ರಹಸ್ಯ’ ಕಾಯ್ದೆ ಅಡಿಯಲ್ಲಿ ಬಂಧಿಸಲಾಗಿದೆ ಎಂದು ವರದಿ ಹೇಳಿದೆ. ಈ ಮೂವರನ್ನು ಕಳೆದ ಫೆಬ್ರವರಿಯಲ್ಲೇ ಬಂಧಿಸಲಾಗಿದ್ದು, ಅಲ್ಲಿಂದ ಇವರು ಬಂಧನದಲ್ಲಿದ್ದಾರೆ.
