ಉದಯವಾಹಿನಿ, ಸಿಡ್ನಿ: ಭಾರತದ ಲಕ್ಷ್ಯ ಸೇನ್ ಅವರು ಭಾನುವಾರ ಆಸ್ಟ್ರೇಲಿಯನ್ ಓಪನ್ ಸೂಪರ್ 500 ಬ್ಯಾಡ್ಮಿಂಟನ್ ಟೂರ್ನಿಯ ಫೈನಲ್ನಲ್ಲಿ ಜಪಾನ್ನ ಯುಶಿ ತನಾಕ ಅವರನ್ನು 21–15, 21–11 ನೇರ ಗೇಮ್ಗಳ ಅಂತರದಿಂದ ಮಣಿಸಿ ಈ ವರ್ಷದ ಮೊದಲ ಪ್ರಶಸ್ತಿಗೆ ಕೊರಳೊಡ್ಡಿದರು. ಹಾಂಗ್ಕಾಂಗ್ ಓಪನ್ನಲ್ಲಿ ಫೈನಲ್ ತಲುಪಿದ್ದ ಅವರು ಪ್ರಶಸ್ತಿ ಗೆಲ್ಲಲು ವಿಫಲರಾಗಿದ್ದರು.
ಸೆಮಿಫೈನಲ್ನಲ್ಲಿ ಸೇನ್ ಅವರು ತೈವಾನ್ನ ಆಟಗಾರ ಲಿನ್ ಚುನ್ ಯಿ ಅವರನ್ನು 21–18, 21–15 ರಿಂದ ಸೋಲಿಸಿದ್ದರು. 2017 ರಲ್ಲಿ ಕಿದಂಬಿ ಶ್ರೀಕಾಂತ್ ನಂತರ ಆಸ್ಟ್ರೇಲಿಯನ್ ಓಪನ್ನಲ್ಲಿ ಪ್ರಶಸ್ತಿ ಗೆದ್ದ ಎರಡನೇ ಭಾರತೀಯ ಎಂಬ ಹೆಗ್ಗಳಿಕೆಗೂ ಸೇನ್ ಪಾತ್ರರಾದರು. ಕುತೂಹಲಕಾರಿಯಾಗಿ, ಆಸ್ಟ್ರೇಲಿಯನ್ ಓಪನ್ ಲಕ್ಷ್ಯ ಅವರ ಮೂರನೇ ಸೂಪರ್ 500 ಪ್ರಶಸ್ತಿಯಾಗಿದೆ. 2022ರಲ್ಲಿ ಇಂಡಿಯನ್ ಓಪನ್ ಪ್ರಶಸ್ತಿಯನ್ನು ಗೆದ್ದರು ಮತ್ತು ಅದರ ನಂತರ 2023ರಲ್ಲಿ ಕೆನಡಾ ಓಪನ್ನಲ್ಲಿ ಜಯಗಳಿಸಿದರು. ಆಸ್ಟ್ರೇಲಿಯನ್ ಓಪನ್ ಗೆಲುವು ಅವರ ವೃತ್ತಿಜೀವನದ ಮೂರನೇ ಸೂಪರ್ 500 ಪ್ರಶಸ್ತಿಯಾಗಿದೆ. ಫೈನಲ್ನಲ್ಲಿ ಲಕ್ಷ್ಯ ಸೇನ್ ಕೆಳ ಶ್ರೇಯಾಂಕದ ಎದುರಾಳಿಯನ್ನು ಹಿಂದಿಕ್ಕಲು ಕೇವಲ 38 ನಿಮಿಷಗಳನ್ನು ತೆಗೆದುಕೊಂಡರು. ಪಂದ್ಯದ ಆರಂಭದಿಂದಲೇ ಆಕ್ರಮಣಕಾರಿ ಆಟವಾಡಿದ ಅವರು ಎದುರಾಳಿಗೆ ಯಾವುದೇ ಹಂತದಲ್ಲಿಯೂ ಚೇತರಿಕೆಗೆ ಅವಕಾಶ ನೀಡಲೇ ಇಲ್ಲ. ಸೆಮಿಫೈನಲ್ನಲ್ಲಿ ಸೇನ್ ಗೆಲುವಿಗಾಗಿ 86 ನಿಮಿಷಗಳ ಹೋರಾಟ ನಡೆಸಿದ್ದರು.
