ಜಡೇಜಾ, ಸುಂದರ್‌ ಅಜೇಯ ಶತಕ – ಡ್ರಾದಲ್ಲಿ ಟೆಸ್ಟ್‌ ಅಂತ್ಯ

ಉದಯವಾಹಿನಿ, ಮ್ಯಾಂಚೆಸ್ಟರ್‌: ರವೀಂದ್ರ ಜಡೇಜಾ ಮತ್ತು ವಾಷಿಂಗ್ಟನ್‌ ಸುಂದರ್‌ ಅವರ ಅಜೇಯ ಶತಕದ ನೆರವಿನಿಂದ ಇಂಗ್ಲೆಂಡ್‌ (England) ವಿರುದ್ಧ ನಡೆದ 4 ಟೆಸ್ಟ್‌ ಪಂದ್ಯ ಡ್ರಾದಲ್ಲಿ ಅಂತ್ಯಗೊಂಡಿದೆ.ಮೊದಲ ಇನ್ನಿಂಗ್ಸ್‌ನಲ್ಲಿ ಇಂಗ್ಲೆಂಡ್‌ 311 ರನ್‌ ಮುನ್ನಡೆ ಪಡೆದ ಕಾರಣ ಭಾರತದ ಬ್ಯಾಟರ್‌ಗಳು ಎರಡನೇ ಇನ್ನಿಂಗ್ಸ್‌ನಲ್ಲಿ ಎಚ್ಚರಿಕೆಯಿಂದ ಆಟವಾಡಿ ಡ್ರಾದತ್ತ ಪಂದ್ಯವನ್ನು ಕೊಂಡೊಯ್ದರು.ವಾಷಿಂಗ್ಟನ್‌ ಸುಂದರ್‌ ಮೊದಲ ಶತಕ ಹೊಡೆದ ಬೆನ್ನಲ್ಲೇ ಎರಡು ತಂಡದ ನಾಯಕರು ಡ್ರಾ ಮಾಡಲು ಒಪ್ಪಿಗೆ ಸೂಚಿಸಿದರು. ಡ್ರಾಗೊಂಡಾಗ ಭಾರತ 143 ಓವರ್‌ಗಳಲ್ಲಿ 4 ವಿಕೆಟ್‌ ನಷ್ಟಕ್ಕೆ 425 ರನ್‌ ಹೊಡೆದಿತ್ತು.
ರವೀಂದ್ರ ಜಡೇಜಾ 107 ರನ್‌(185 ಎಸೆತ, 13 ಬೌಂಡರಿ, 1 ಸಿಕ್ಸ್‌) ವಾಷಿಂಗ್ಟನ್‌ ಸುಂದರ್‌ 101 ರನ್‌( 206 ಎಸೆತ, 9 ಬೌಂಡರಿ, 1 ಸಿಕ್ಸ್‌) ಹೊಡೆದರು. ಜಡೇಜಾ 5ನೇ ಟೆಸ್ಟ್‌ ಶತಕ ಹೊಡೆದರು. ಇವರಿಬ್ಬರು ಮುರಿಯದ 5ನೇ ವಿಕೆಟಿಗೆ 334 ಎಸೆತಗಳಲ್ಲಿ 203 ರನ್‌ ಹೊಡೆಯುವ ಮೂಲಕ ಪಂದ್ಯ ಕೈ ಜಾರದಂತೆ ನೋಡಿಕೊಂಡರು.
ನಿನ್ನೆ 87 ರನ್‌ ಗಳಿಸಿದ್ದ ರಾಹುಲ್‌ 90 ರನ್‌ ಗಳಿಸಿ ಔಟಾದರೆ 78 ರನ್‌ ಹೊಡೆದಿದ್ದ ನಾಯಕ ಶುಭಮನ್‌ ಗಿಲ್‌ 103 ರನ್‌ (238 ಎಸೆತ, 12 ಬೌಂಡರಿ) ಹೊಡೆದು ವಿಕೆಟ್‌ ಒಪ್ಪಿಸಿದರು. ಇಂದು ಒಟ್ಟು 82 ಓವರ್‌ ಎಸೆದರು ಇಂಗ್ಲೆಂಡ್‌ ಬೌಲರ್‌ಗಳು ಕೇವಲ 2 ವಿಕೆಟ್‌ ಪಡೆಯಲ ಮಾತ್ರ ಯಶಸ್ವಿಯಾದರು.
ಈ ಪಂದ್ಯ ಡ್ರಾದಲ್ಲಿ ಅಂತ್ಯಗೊಂಡ ಕಾರಣ 5ನೇ ಟೆಸ್ಟ್‌ ಪಂದ್ಯವನ್ನು ಭಾರತ ಗೆದ್ದರಷ್ಟೇ ಮಾತ್ರ ಸರಣಿ 2-2 ರಲ್ಲಿ ಸಮಬಲವಾಗಲಿದೆ.